Myamar ramah dik lo taka thuneihna pawng lak a nih atanga kum khat chhungin military council sipaiho kah hlum vanga pawisawi lo civil mi thite chu mi 1861 awmin, man tawk 13822 an awm thu Assistance Association for Political Prisoners (AAPP) pawl chuan thuchhuah an siam a ni.
He chhinchhiahna hi nikum 2021 February ni 1 atanga kumin May ni 24 thlenga AAPP record lakkhawm a ni a, a takah chuan chu ai pawha thi an tam zawk a rinawm thu tarlan tel a ni a.
Spring Revolution chhungin vawiin tlenga man tawk zat chu mi 10769 niin, chung zinga mi 1078 chu jail tantir an ni tawh a. Jail tang zingah kum 19 hnuai lam pahnih telin mi 72 chu thi tura an chung thu rel a ni.
Arrest warrant chhuah avanga biru mi 1979 awmin, tih hlum tawk 41 telin mi 120 chu tihhlum tawh anga an chungthu rel tawh a nih laiin, tih hlum tura tih chu mi 113 thleng an awm tawh a ni.
Chu bakah thuneihna lak a nih atanga kumin 2022 April thla tawp thlenga military council sipaiten dik lo taka in an kalhsak tawh zat chu 570 chuang a nih thu thu AAPP chuan a tarlang bawk a.
Sagaing region, Khin Oo Township, InDailay khua chu military council sipaiten May ni 20 chhun khan laipuia kapin an luh chhuah a, chenna in an hal nual bawk tih hriat a ni a. Chu thil thlengah tualchhung mi 3 Ko Naing Oo, Ko Win Boe leh Ma Long Khin te chu laipui mu puakin an dang hlum a, kum 75 mi U Sein Lyin pawh hal hlum a ni.
Chutiang bawkin Sagaing region, Miau khuaah pawh May ni 22 chawhnu lam dar 1:30 velah military council sipaihovin, Shwe Bon Ta khuaa awm Ko Sai Nyi Nyi chu PDF nena inzawmna nei tiin an man a. Ani chu khaw chhunga a bazar laia man a ni a.
Chutianga tualchhung, khaw chhung leh hmun hrang hranga pawl hruaitu, activist te, chanchinbu mite, CDM-a tel te leh pawl hrang hranga mite man, hren leh thubuai siamsak tawkte bakah Revolution chhunga nunna chante chanchin thar hriat nei chuan AAPP a hrilh hriat zel theih a ni.
