UN Secretary General hlui Ban Ki-Moon-a Naypyitaw khawpuiah a zin

UN Secretary General lo ni tawh Ban Ki-Moon-a chu Myanmar Military council-te sawmna angin  April 23 chawhnu khan Naypyitaw khawpuiah a tlen thu hriat a ni.

Military council thupuangtu pawhin Mr. Ban Ki-Moon a thlen thu VOA Media zawhna chhangin a kimchang erawh a sawi chhunzawm lova. Ban Ki-Moon Naypyitaw khawpui Airport-ah a thlen hian Myanmar sorkar thuneituten an lo hmuak a, a zinna chhan kimchang engmah hriat chian a ni rih lo. 

Ban Ki-Moon hi Myanmar tana hmalakpuitu inpe tak a ni thin a, khawvel ram hruaitu hlui insuih khawm The Elder pawla Vice Chairman a ni bawk a. Kum 2015-a U Thein Sein-a President a nihlai pawh khan Myanmar sorkar leh Ethic group ralthuam keng pawl te nena inkahhaina thuthlung (NCA) hming an sign tum pawh khan Ban Ki-Moon hi a hriatpuitu a ni nghe nghe a.

Kum 2021 atanga Myanmar Military council ten thuneihna an lak hnu atang khan tharumthawhna tihtawp a nih theihna turin leh tuna UN General secretary te nena thawhho a nih zel theih nana hmalatu a lo ni tawh thin a. Tun tuma Ban Ki-Moon-a rawn zinna hi ni rei lo hun chhung chauh a ni dawn a, Myanmar Military council-te nena thu an sawi ho beisei a ni.

Myanmar Military council ten tharum an thawhna chungchangah titawp thuai turin UN security council-ten an lo rel tawh a. Myanmar Military council sipai puipa ber Min Aung Hlaing pawhin remna leh muanna a awm zel theih nan hma ka la zel ang tiin sawi mah se, NUG sorkar leh PDF te ka nuai chimit vek dawn tiin a sawi leh a; chu bakah NUG/PDF thlawptu reng reng pawh action ka la zel dawn tiin an vau bawk a ni.