May ni 4 khan, Naypyidaw MICC-2 Hall-ah ropui takin MRTV Application hmelhriattirna hun buatsaih a ni a, chutah chuan sipai hotu ber Min Aung Hlaian thusawina hun a hmang a.
Mahse, Min Aung Hlaian a lo intihtheih pui em em leh chhuang taka MRTV application, khawvel mipui a hmelhriattir chu a tuk lawk, May ni 5-ah khawvel mipui hman tam ber Apple Store leh Google Play Store-in an platform atangin an paih a, hman theih a ni lo zui a, chu mai bakah MRTV website thar pawh online site atanga dah bo a ni. Ropui taka hmelhriattirna chuan awmzia a neih thui loh mai bakah thil zahthlak takah a chang zo ta a ni.
Min Aung Hlaia mualphona MRTV app hmelhriattirna leh Application siamtu US company Apps Web Social LLC chanchin chu human rights activist pawl Justice for Myanmar chuan a hming puang zarin, a chilh zui a, chu mi hnu lawkah Application chu lak thlak daih a ni.
Lakthlak a nih hmaa MRTV app hmelhriattirnaah chuan Min Aung Hlaia thusawi laiin a hnungah Apple Store leh Google Play Store Logo te chu lian taka tarlan a ni a.
Mipuite sawisel rawn leh kawng hrang hranga beih rawn Min Aung Hlaia kaihhruai Military council chuan hetiang a theih ang tawk Application siamin, a policy theh darh a, chanchin dik lo leh der te, democracy activist-te firfiak pawla chhuahin, man tawk sawisakna thlalak mipui tihthaih nante hmangin tum nei takin mipui thluak suksak a tum leh a ni ber a.
Kawng leh lamah chuan military council Application chu Play Store phalna angin a hmangtu location tarlan leh chhui theih a nih bakah, aw, thlalak leh video te pawh record vek theih a nih dawn avangin a hmangtute tan thil tha lo tak a thlen thei dawn a ni.
Chuvangin, Apple company leh Google company-Alphabet ten an platform atangin dah bo tur leh Myanmar sipaite leh an thunun pawlten hmang thei miah lo tura kharsak vek bawk turin Justice for Myanmar pawl chuan a ngen nghal bawk a.
Chutianga MRTV application te Apple store leh Google Play Store atanga dah bo chungchangah International company pakhata thawk IT expert pakhat chuan, “Sipaite khawsak dan rawng tak avangin, an propaganda thehdarhna tur hmanrua pakhat MRTV application-te chu Apple Store leh Google Play Store atanga dah paih thlak a ni dawn tih chu a siamtu US company pawhin an hriat lohna chhan tur a awm lo. Mahse, thil ni thei tak tak tur emaw tia hmelhriattirna hmuna uang taka thusawitu Min Aung Hlai erawh a mualpho phah ta a ni. Tun lai IT khawvelah mahni thuneihna sawh ngheh tuma thu dik lo, inhuatna thehdarh a, mipuite awp tuma hmalak chu a theih tawh loh. Chu mi hre thiam lo leh inchhir lova, mahni thuneihna hmang khaw lova mipui rahbeh a tum tlat a nih chuan Min Aung Hlaia ni thlak hun chu a rei tawh lovang,” tiin a sawi.
