Myanmar sipaite nena inzawmna nei, human rights bawhchhia, environment tihchhiat hmang nia finfiahna nena tarlan theih company 56 te chu UK based Burma Campaign pawlin black list-ah dah belhin, tunah chuan Dirty (hming chhe) list-a an dah international company 172 an awm tawh thu hriat a ni.
Chung company 170 chuang zinga a tam zawk chu firfiak sipaite nen sumdawnna, ralthuam leh sipai lam khawl lama thawhhona nei an ni a.
Burma campaign pawla director Mas Famana chuan, “Myanmar sipaite tana thawhhlawm emaw ralthuam emaw zawnga tanpuina pe thin international company te chu zawn chuah zel a ni a. Genocide, thuneihna pawng lak leh naupangte pawngsual thin sipaite nena sumdawnna kawnga inzawmna neih chu engti kawng maha pawm theih a ni lo,” tiin a sawi.
US, Japan leh South Korea ramten ralthuam hralh chhuah chu khap mah se, Russia leh India ang chi ramten an ralthuam hralh chhuah theih nan leh Myanmar sipaiten tanpui theih nan an company thenkhat kaltlanga indawrna an la kaltir reng thu a sawi bawk a. Tuna dirty list-a a rawn tar chhuah thar, Myanmar sipaite ralthuam lama tanpuitu international company list thar zingah Russia company 15 telin, Britain company 2 leh US company 3 a tel thu hriat a ni a. Chung company ho chanchin kimchang chu https://burmacampaign.org.uk/take-action/dirty-list/ website-ah hmuh theih a ni.
