Myanmar mipuite tana tanpuina an dawn tur chungchangah Military Council-te thununna hnuaiah ni se tia an thutlukna chu Myanmar leh ram hrang hrang pawl 765 ten an rem tih loh thu an chhuah.
He thutlukna hi Military Council-te thlawpna a nih angin ram chhung mipuite dan lova an sawisakna tawmpui a, tanpuina hmanga ralthuam leina peksak ang a ni tiin Pawl hrang hrang te chuan an sawi.
Pawl hrang hranga rem ti lo hming sign te chu; Hmakhalh pawl te, Burma Campaign te bakah pawl hming nei 451 leh pawl hming nei lo 314 te an tel.
Myanmar Military Council te kut hnuai atanga ram mipuite chhawmdawlna leh a tul anga hmalakna tura ASEAN te thutlukna siam hi ram hrang hrang ten an dem hle a. Ram dang atanga ram chhung tlawmngai pawl hrang hrang te duhsak a nih theih nan an beisei hle.
ASEAN hian NUG, Myanmar chugchanga UN palai Meeting thiltih hnualsuat a nih dawn chuan awmzia a nei lo ang a. ASEAN thurel anga an hnungtawlh loh a nih chuan Military Council te vulh lenna leh hei aia hian che nunrawng rawh se tihna ang a ni tiin an tar lang bawk.
ASEAN leh US Special Meeting hneih hma hian ASEAN, Foreign Minister te sawihonaah he thutlukna hi tihdamlam nei thei se tiin NUG leh ralthuam keng pawl (EAO) ten an ngen.
Tanpuina pek turah hian Military Council ten mipuite a sawisak lai pawhin ralthuam keng pawl EAO awmna ram chhung hmun zawng zawngah sem darh a ni ang tiin ASEAN te beisei chu thil awiawm loh a nih thu an tar lang tel bawk.
US, Foreign Ministry thupuangtu Ned Price chuan “ ASEAN thu nemngheh 5, tihpuitlin a nih loh avangin ASEAN Meeting-ah Myanmar-a politic lam tel lo palai in sawmna kha ka thlawp a. Nakin lawka US-ASEAN Meeting-ah pawh thu nemngheh point 5, a puitlin theih nan rel tum a ni” tiin a sawi.
