Pi Suu Kyii laka thamna leh eirukna thubuai siamsak case 4 chu Mya ni 24-ah Naypyidaw special court-in a pawm thu hriat a ni.
Chung thubuaite chu Daw Khin Kyi Foundation hnuaia Vocational Training School project atana Naypyidaw Auh-Tah-Tirih township leh Boh-Dah-Tirih township-a in hmun neih chungchang thubuai, Foundation tana thawhlawm sum lut chu Foundation Chairman Daw Aung San Suu Kyii chenna in sak nana hman thubuai, Yangon-a Daw Khin Kyi Foundation main office hmun leh building chu a awm tawk luah man pek loh thubuai te a ni.
Chung thubuaiah chuan Daw Aung San Suu Kyi rualin, Naypyidaw Mayor Dr. Myo Aung, Deputy Mayor U Ye Min Oo leh Naypyidaw Municipal Committee member U Min Tu te pawh an tel a.
Chung thubuai chu May ni 31 atanga chhui chian leh court lama thuzawh fiahna neih a ni ang.
May ni 24-a court-ah chuan Business owner Maung Weik hnen atanga Daw Khin Kyi Foundaiton tana thawhlawm US dollar nuai 5 leh a chanve, thamna la nia puhna chungchangah a khingtu lam thuhretu chu Pi Suu Kyii ukilten thu an zawhfiah thu hriat a ni.
He thubuai court lama ngaihtuah chhunzawm leh hun tur chu May ni 31 bawk ruat a ni a.
Daw Aung San Suu Kui chuan tunah thamna/eirukna thubuai 10 aia tlem lo a hmachhawn mek a, Yangon Chief Minister Pyu Min Thein hnen atanga rangkachak leh US dollar tam tham tak la nia puhna thubuaiah thiam loh chantir tawh niin, April ni 27 khan kum 5 jail tang tura thutlukna siam a nih mai bakah, environment lamah case 2, Section 505 (B) leh Import & Export case-ah pawh kum 6 chhung jail tang tura rel fel a lo ni tawh bawk a ni.
