Arakan Army (AA) lamah military council sipai za chuang fe an tlan luh thu chu June ni 14-a press conference neihnaah AA thupuangtu Khaituhkha-in nemnghetin a sawi chhuak a.
Chung military council hnen atanga tlan chhuakte chu mihring puite tanpuina (humanitarian) zawng pui an nih bakah, an chenna tur thlenga ruahmansak an nih thu AA thupuangtu chuan a sawi bawk a.
Mahse sipai lam atanga rawn tlan chhuak a zat chiah chu sawi chhuah kher a tum loh thu a sawi lang bawk.
Firfiak military council chu ram pum huapah mipui venghimtu pawl PDF leh ethnic armed (ralthuam keng) pawl hrang hrangte hmachhawnin indona hmun tamah a che chhe zawkah a tang char char a.
Chutih rualin sipai zingah awm thenkhat mipui thah duh lote chu ethnic armed organization, PDF leh NUG lamah an inpe deuh reng a. National Unity Government (NUG) hnena inpe sipaite chu sing chuang dawn an tlin tawh thu NUG Prime Minister Man Win Khai Than chuan a sawi a ni.
