Military council sipaite a zung chawpa phawi chhuak vek tur leh khaw chhung lak operation nei turin Commando Special Force din a nih thu National Unity Government (NUG) Defense Ministry, Northern Regional Command Headquarters chuan thuchhuah a siam a ni.
NUG People Defense Froce NUG Northern Regional Command Headquarters, brigade 7, battlion 703-a Second Commander Colonel Than Zin Aung chuan, “Khua hal a, thil ruk leh pawisawi lo mipui thattu military council a zung chawpa phawi chhuak turin, keini battalion chuan Commando special force kan din a. He battalion hian military council sipaite camp, khaw chhung lak leh special operation hna an thawk dawn a ni,” tiin a sawi.
Nakin lawkah battalion lamin Ministry of Information kaltlangin an thil ruahman dante tarlan a ni dawn a.
Thuneihna laktu sipaihovin mipuite tharum hmanga rah beh leh tihhlum hna a thawk reng avangin mipui lamin mahni damkhaw chhuah nana lo inven theihna (rights) hmangin mipui defensive war chu beih mek a ni a. May ni 7 atanga June ni 6 thleng, thla khat chhungin military council lamah mi 2000 chuang an thi niin NUG chuan thuchhuah a siam a.
Chung thuchhuaha tarlante chu nikum 2021 June ni 1 atanga kumin May ni 17 thlenga record lak khawm atanga puan zar a ni a; mahse Myanmar ram puma inkahnaa sipai thi leh hliamte chanchin kimchang chu military council lamin puanzarna a nei ve lo thung a ni.
Myanmar ram pumah mipuiten sipai thuneihna leh lal hrawtna chu Myanmar leilung ata tihtawp a, Federal democracy tun din theih nan ralmuang taka kawngzawhnate chu state leh region hrang hrangah kalpui mek a ni bawk.
NUG sorkar din a nih atanga kum 1 chhungin mipui venghimtu pawl (PDF) battalion 257 din a ni tawh a, township based mipui venghimtu pawl (VDF) te pawh township 25-ah mumal taka din theih a nih thu hriat a ni a.
Chutih rualin PDF te nena inthlunzawm Local PDF te, Urban Guerilla pawl 500 chuang chu awmze nei taka indona hmachhawn ho thei tura inrelbawl vek a nih tawh thu leh chu aia tha zawk Chain of Command nei chho a, hmelhmate nuai chimit a, hneh vek thei tura inpuahchah a ngaih NUG chuan a thuchhuahah a tarlang bawk a ni.
