Sagaing region kalaymyo township Thuhma khuaa inkhuar sipaite rawn chhuak chu June ni 21 zing lamah Thuhma khaw chhak lamah Kalay PDF ten an lo beih thu hriat a ni.
Kalay PDF lamin rahpuah bomb kama an lo beih hnuah silai lian leh te hmangin an inkap a, sipai 7 aia tlem lo an thih thu leh Kalay PDF lamah tumah hliam awm lovin an tawlhsawn thei a.
Tualchhung mi pakhat chuan, “Sipaite chu zing lamah khua an rawn lut a. Force 100 vel an ni. Khaw chhunga awmte an tlan chhuak a. Chenna ina mihring awmna hmun a piang chu rawkin thil an ru a. Tichuan khaw chhung chu a tuk zingah an chhuahsan leh a. An chhuahsan hnu lawk, khaw chhak lamah inkahna a chhuak nghal a, silai puak ri pawh a ring khawp mai. Sipaiho thih thu kan hre nghal a. Mahse an ruangte chu an la chhar lo a ni tiin DVB a hrilh a.
Military council sipaiten opration an neihna khua zawng zawng chu an rawkin, an hal chhia a. Tunah hian military council-in Kalay township chhungah internet line tam zawk chu titawpin chanchin thar engmawh hre thei lo turin a thla khat chuang a hrek tawh a, chutih rualin operation a nei reng bawk a ni.
Tun hnaia military council sipaite leh Kalay PDF te inkara boruak sosan zel avangin, Kalay-Gangaw kawng chu a na zawnga kal lo tur leh military council sipaite nen direct-a inbe lo tur leh fimkhur taka awm zel turin Kalay PDF ten mipui lam chu an ngen a. Mahse, sipai lamin chung inkah chungchanga thihna thlen dan kimchang engmah a tarlang ve ngai lo a ni.
