ZRA (EC) sipaite chu June ni 20, chawhnu lam dar 3 velah Ciangpikuat khuaah lutin, Civil Disobedience Movement (CDM) zirtirtu pakhat, police pakhat leh zirtiru hmeichhia pakhat, mi pathumte chu khaw pawn lam, Baptist thlanmual bulah hruaiin darkar 3 chhungin an sawisaa an vuak thu tualchhung mite hnen atanga hriat a ni.
Chung mi 3 te sawisaa thu a zawhfiah hnuah chhuah leh mah se, June ni 25 ral hmaa khaw chhuahsan nghal turin ZRA (EC) chuan an hnawt chhuak a.
Chung man leh sawisak tawkte chu an kal hleih theih loh avangin, khaw chhung miten bike-in an va hruai a, an zinga pakhat chu khaw danga a insawn tawh thu hriat a ni.
Ciangpikuat veng chu Tedim khua atanga mel 18-a hla, in za chuang awmna leh high school awmna khua a ni a.
He thil thleng chungchangah ZRA (EC) chuan June ni 21-ah thuchhuah siamin, chung mi pathumten Zomi Army-te chet dan chu ralthuam keng pawl dangte hnena an hrilh avang leh tualchhung upate remtihna school hawn tumna an tihbuai avanga man an nih thu an tarlang a.
Zomi Revolutionary Army (ZRA-EC) chuan military council-in Myanmar ram puma school a hawn lehna an thlawp thu May ni 30-ah thuchhuah an lo siam tawh a.
ZRA (EC) pawl chuan tun hma deuh pawhin thneihna latu sipaite dolettu Chin state chhunga Chinland venghimtu pawl (CDF/PDF) te camp tihchhiatsakin a lo bei vak tawh bawk a ni.
Kum 2021 May ni 22-ah Tedim township-a inkhuar Zomi Revolutionary Army ZRA (EC) mipui sipaite camp a laksak bakah, 2021 June ni 16-ah pawh PDF-Zoland sipai camp pakhat chu beiin, silai, ration, damdawi leh hmanraw dang Kyat nuai 60 man hu vel an tihchhiatsak bawk a.
Kum 2021 September thla chhungin Tedim township-a awm CDF-Hualngo camp chu ZRA ten tichhiain, 2021 December ni 5-ah pawh PDF-Zoland hruaitu pakhat U Cin Sian Suam chu Tedim khuaah ZRA ten an lo kap hlum tawk bawk a ni.
Chuvangin, CNF/CNA telin Chinland defense force pawl 17 insuihkhawma din Chinland Joint Defense Committee (CJDC) chuan ZRA (EC) chu kumin April ni 12-ah firfiak pawla a puan thu thuchhuah a siam zui ta a ni.
