Shan state chhim lam, Taungyi khuaa Deputy General Soe Win-a chuanna motor inzui chu SYM UGPDF pawlin a thlen hmain bomb an tipuak a, police pahnih thiin, traffic police 2 an hliam nat thu SYM UGPF chuan June ni 26-ah thuchhuah an siam a.
June ni 24-a Taungyi khua thleng sipai lal ber dawttu Soe Win-a motor inzui chu Guerilla pawl SYM UGPDF ten chawhnu lam dar 1:25 velah Soe Win-a thlen hma lawkin, an bomb kam chu chhan hrang hrang avangin, Taungyi traffic point bulah an tihpuah thu hriat a ni.
SYM UG pawla sipai pakhat chuan, ”Kan mission-ah chuan traffic police 2 an hliam nah le a, police officer pahnih an thi bawk niin dawnfawh lam report atangin kan hria. Chu bakah sipai uicho motor pahnih darthlalang pawh a keh chhe bawk a ni. Soe Win-a cham chhung chu kan bei zel dawn,” tiin a sawi.
Nakin zelah pawh SYM UGPDF ten a remchan dan azir zelin mission kalpui a ni dawn a, mipuiten military council sipaite nen awmho emaw inhnimhnawih emawa awm lo turin kan hriattir nawn leh duh che u a ni, tiin SYM UGPDF lam chuan hriattirna thuchhuah an siam nghal bawk a ni.
