Chin state chhim lam Mindat township-ah June ni 29, zing lam dar 9 vel atangin military council sipaite leh CDF-Mindat pawlte an inkap a, Madat khuaa tleirawl pakhatin sipaiho laipui mu puakin perin a thih thu hriat a ni.
Mindat khaw chhung IB 274 battalion atangin June ni 29 zing lam dar 10 pelh velah Mindat khaw hmar lam Madat, Chia-Ein-Nu khaw lamah laipui kah puah a ni a, Madt khaw chhung tla puak chuan kum 14 tleirawl pakhat chu per fuha thih thu tualchhung mi pakhatin a sawi.
Ani chuan, “Madatah tleirawl pakhat a thi a. A hmain a nau pawh laipuia kah fuh tawh niin, damdawi in dah luh a ni a, tun thlengin a la awm. Tun hmaa a tlakna hmunah tho rawn tla lehin a u chu a fuh a, a thi ta a ni,” tiin a sawi.
Chu tleirawl thi ta nau erawh chu May thla vela military council sipaite laipui kah hliam niin, a ke leh lam tan a ni a.
May ni 23 pawhin IB 274 battalion chuan laipui pawng tawng kahin Madat khuaah vawi ruk a tla puak a, tuna thi ta nau kum 11 mi chu bomb si perin fuhin a ke vei lam chu damdawi inah tanin la enkawl reng a ni.
Military council sipaite laipui kah chhuah bawkin Chia-Ein-Nu khuaa in pkhat leh vawk pakhat chu kangin a thih thu hriat a ni a.
Mindat township Pa Luan Tui khaw lamah pawh June ni 29 zing atangin inkahna a chhuak a.
CDF-Mindat thupuangtu Salai YawMan chuan, “Zing lam dar 10 velah CDF leh military council sipaite chu Pa Luan Tui khaw bulah kan inkap a. Chhun lamah rei vak lo chawlin tlai lam dar 3 velah inkahna tan a nil eh a. Operation neia rawn luh zel tum an nih hmel a, an rawn kal zel dawn nge tih chu kan enthlak a ngai a ni,” tiin a sawi.
June ni 16-ah pawh IB 274 battalion atanga laipui pawng tawng kah avangin Mindat township, Muitui khuaah tla puakin lo-a hna thawk kum 70 mipa, kum 60 mi leh kum 30 mi hmeichhiate fuhin an thih thu hriat a ni.
