NUG-ina Federal School a tih, mi hriat hlawh Kaung For You School-a zirtirtu mi 15 te chu hmanni lawk khan an man thu Myanmar zirtirtu insuihkhawm pawl ten July 18 khan RFA a hrilh.
A man te hi Yangon Region, Kyimin Taing leh Inn Sein township-a mi 2, Tanin Tharyi Region, Myeih township-ah mi 5, Shan State, Ka Law leh Taung Gyi township-ah mi 5, Mandalay Region, Meiktila township-ah mi 2 leh a awmna zawn mek mi pakhat te, an nih thu Myanmar zirtirtute insuihkhawm pawl, Security mi pakhat chuan a sawi.
“Ka hriat dan chuan mi 15 an man. Yangon, Mandalay, Shan leh Tanin Tharyi Region mi te an ni a, an chhung ten an ngaihtuah hle. An man hma hian Kaung For You School ka hriattir hmasa a, Public thil a nih avangin palh thleng thei a ni ka tia. Hetia thil a thleng hi chu ka rilru a nuam lo hle”.
July 13 atangin 18 thleng, ni 6 chhung hian ram chhunga Kaung for you School dintu Saya U Kaung Taih Soe tiamin zirtirtu mi 15 te an chenna inah an man thu a sawi zui bawk.
Kaung for you Online School hi CDM lut zirtirtu, Mandalay Region, Myitta township, Asst. Head of Education U Kaung Taih Soe-a huaihawtnain ram chhungah din a ni a, CDM zirtirtute leh zirlai mi 20000 velin Online-a zir theih tura ruahman a ni.
A bik takin Military Council-te duh lova CDM lut te leh an fanau ten sorkar school kai duh lova, zirna khaihlak lova Online-a zir tum a ni. He zirna hi NUG nen a inthlun zawmna a rei tawh a, July 13 hian zir tan tura ruahman a ni.
Zir tan tura an ruat July 13-ah hian an Head, U Kaung Taih Soe leh CDM zirtirtu mi 2 an man a. An man thu hi Military Council ten July 16-ah Social Media-ah an tar lang.
Hemi hnu hian Schoo Internet an rawk a, CDM zirtirtute list an hmuh te chu an man a, zir tur zirlaite leh an chhung ten man ve an hlauh thu RFA an hrilh.
NUG sorkar hian hetia naupang lehkha zir tur te buaina an siam hi a dem hle. A man tak Kaung for You School-a zirtirtu leh zirlaite tanpui a nih theih nan Phone-a biak theihna hawn a nih dawn thu July 17 khan an thuchhuahah an tar lang.
