Myanmar-ah Military Council ten sorkarna an pawng lak, kum 2021, January 1 atanga July 15, thleng khan chenna in leh Biak in tiamin 28000 chuang an hal chhiat tawh thu Institute for Strategy and Policy-Myanmar chuan an thuchhuahah an tar lan thu hriat a ni.
July 26-a an thuchhuahah chuan ralthuam buaina avanga hal chhiat te, ralthuam lian fuh vang te, Military Council te inkahna vang ni lo Khawchhung lut chilha an hal avang hian kum khat chuangin chenna in leh in dang 28419 hal chhiat a nih tawh thu an tar lang.
Heng an hal chhiatna hmun te hi Sagaing, Magwe (Ma Gui), Mandalay, Taninthary (Ta Nin Ta Ri, Bago (Pa Gu) leh Chin, Kaya, Shan, Mon, Kayin State-ah te an ni a. Sagaing Region-ah hian chenna in 20485 hal chhe tawhin a tam ber a. Magwe Region-ah chenna In 5705 aia tlem lo, hal chhe tawhin a tam ber dawttu a nih thu hriat a ni.
A hal chhiat tawh zingah hian kum 2022 May thla chhung khan chenna in leh in dang 8313 hal chhiat a ni a, sorkarna an lak hnua an hal chhiat tam ber a ni. Chenna in leh in dang an hal chhiat tawh zawng zawng hi 30% vel a nih thu ISP-Myanmar chuan a tar lang.
Kumin 2022, July 1-15 chhung khan ram chhungah chenna in 535 an hal chhe tawh a. Sagaing Region-ah in 283 aia tlem lo, Magwe Region-ah in 230 aia tlem lo an hal chhia a, tualchhung mi 6 chuang an thi tawh bawk. Magwe Region chhungah hian Tuialhthei khur 150 zet hal chhiat a nih thu hriat a ni.
