Sagiang Region, Kalaymyo-ah tuialhthei man a san chho zel a, tuialhthei Dawr thenkhatah lei mai tur a awm loh avangin mipui ten harsatna an tawh thu tualchhung mi te hnen atanga hriat a ni.
Vawiin khan Kalaymyo BOC tiamin Petrol pumb Dawr thenkhatah lei tur a awm loh avangin an khar nual thu Petrol lei tura kal, mi pakhat hnen atanga hriat a ni.
“ Tahan atangin Bike tui thun turin ka kal a, Bus Station (Bu Da) kawngpengthuama Petrol Pumb Dawr a inkhar a. Ka zawng leh a, BOC ka thleng a, lei tur a awm tawh loh avangin an khar thu min hrilh leh. Tun hmaa ka thun thinnaah ka kal leh a, K.3000 man chauh thun an phal a. Sum awm mah se, a lei teuh theih loh ang a ni ta, hma lam hun a ngaihtuahawm khawp mai” tiin a sawi.
Kalaymyo-ah hian Octane 92, Galon khatah K.16000-18000 man inkar a ni a, Octane 95 Galon khatah K.18000 man chung lam a nih thu hriat a ni.
Tualchhunga in neitu nu pakhat chuan “ Ka fanu hi, a hmakhua ngaiin Pre-School-ah thlahin ka hmuak thin a. Hetia Pretrol man a san tak avangin keini anga sum lut nei lo tan chuan tun hma angin kea kal kan hmabak ta a ni” tiin a sawi.
Kalaymyo khawpui hi Bike hman tamna khawpui pakhat a ni a. Hetia Petrol man a san tak chiam avangin mipui ten harsatna an tawk nasa hle tih hriat a ni.
Kalaymyo atanga Chin State, Halkha khawpuia Car service, Driver pakhatin a sawi angin tun anga tuialhthei man a san chhoh zel chuan tun hma rate angin tlan a harsa tawh ang a, tihdanglam a tul mai thei” tiin a sawi.
