Yangon region, Dalah township, Yakhine Chaung khaw bulah Torpedo factory sak leh Nay sipai cam upgrade hna chu Min Aung Hlaia fapa Aung Pyit Sone-a company Sky One Construction-in sak theihna permit a neih angin, factory building, lei leh helicopter tumna thlenga a lo sak zawh tawhte chu a hlan fel tawh thu hriat a ni.
Dalah township, Yangon tuipui kama awm Torpedo rocket factory leh Navy camp chu Thanlin township chhunga tui hnuai lawng awmna hmun leh Navy camp nen inep chiahin a awm a, chung Torpedo rocket factory leh Navy camp te sakna (construction) hna chu Min Aung Hlaian a fapa a lo pek vek tawh a ni a. Chung Torpedo rocket factory hmunte chu, tui hnuai lawng (sub-marine) leh sipai lawng (military weapon ship) te lo kap chhe thei tura duan a ni a. Tun dinhmunah Min Aung Hlaia fapa a hna a zawh thaw khat tawh avangin nakin lawkah Russia lamin khawl an rawn bun dawn thu hriat a ni bawk a.
News source pakhat chuan, “GE regime chu factory leh sipai camp vel sa turin tun hnaia lawka pek a ni a. Factory building chu zawh a ni tawh, a ruak vek a, khawl a la rawn thleng lo. Russia siam khawl bun an tum a ni awm e,” tiin a sawi.
Firfiak military council hian tuihnuai lawng (submarine) hlui (secondhand) 2 a nei a, pakhat chu Russia siam Min-Ye-Theinkah tih hming pu niin, kum 1980-a Russia hnen atanga India lei, 2020-ah India-in Myanmar sipaite a pek a ni a, a pahnihna chu Min-Ye-Kyaw-Thin tih hming pu submarine te chi China ramin ni kum lama a pek a ni.
