Magwe (Ma Gui) Region, Gangaw township Mit Ta, run tuikhuaha Military Council, sipai buk inkhuarte chuan August 21 khan Khaw 4-ah an luh chilh avangin tualchhung mi 1000 chuang an tlanchhiat thu hriat a ni.
Sapal (Sa Pe), Pa Nan leh Sin Pone (Sin Pong) khuaah Military Council sipai ten an luh chilh avangin tualchhung mi an tlanchhe nual a. Military Council sipai te hian khawchhunga chenna inah lutin bungrua an lak nual thu tualchhung mi pakhat hnen atanga hriat a ni.
Tun dinhmunah hian Military Council sipai te hian Gangaw huam chhunga Sin Pone khuaah Camp siamin an innghat mek.
Gangaw PDF pawla an hotu chuan “ Sin Pone khua chu kan kap lo. Khua an chhuahsan chuan kap thei dinhmunah an awm a. Khawchhung kan kah chuan mipui an awm si a. Chuvangin in saseng turin kan hrilh” tiin a sawi.
He khuaa mipuite hi Military Council sipaite nen inhlat thei bera awm turin leh Gangaw huam chhung Mit Ta, run chheh vel bakah Gangaw-Min khua kawngah mipuite kal lo turin Gangaw PDF ten mipuite an hriattir.
Magwe Region, Pakokku (Pa Kuk Ku) township leh Gangaw township vel hi May thla chawlhkar 3-na atang khan Military Council sipai ten operation an nei tan a. May 26 khan Gangaw PDF nen Mit Ta, run kiangah khawmual lam leh chung lam atangin an inkap nasa hle a, PDF sipai lam mi 7 an boral.
June 19 khan Mit Ta, run tuikhuah atanga chhuak ,Military Council sipai operation te chu PDF-Gangaw chhim lam nen, tangkawpin an kap a. June 8 pawh khan Military Council sipaite kal lai chu PDF-Gangaw 701, Battalion (YRPA) ten Bomb kam hmangin an bei a. Military Council sipai lam mi 5 an thi.
