Sipai leh Police te Min Aung Hlaia thupek hmangin an hlawh punsak a ni a, military budget chu thla tin Kyat billion 10 chuang a pun phah dawn nia thu dawn a ni.
Min Aung HLaia kaihhruai firfiak military council pawl chuan sipai leh police ho chu nun derthawnga awm man tia hming puttirin mi pakhat tan Kyat 30000 zela an hlawh tihpun a nih thu Nypyidaw lam source-in a tarlang.
Police department lam chu July thl atang tawha punsak a ni a, sipai lam chu August thla atangin ‘nun derthawnga awm man’ hlawh pek an ni a, sipai chhungkaw tam zawkin chung nun derthawnga awm man hlawh chu an lak tawh thu hriat a ni.
Naypyidaw source chuan, “Tun hma chuan mi pakhatah Kyat 10000 pek a ni a, tunah 20000 pun belhin mi pakhatin sing thum a la thei a. Hlawh pung anga sawi a ni lo. Hlawh pung anga sawi chuan thil man kai sang tur leh sorkar hna thawk dangte phun nawi an hlauh vang a ni,” tiin a sawi.
Police lamah chuan mi pakhatin nun derthawnga awm man thla khatah Kyat 10000 chauh a la thei a, ral hmatawnga kalte chauhin a bak sing 2 an dawng a, tichuan sing 3 an la thei chauh a. Ral kap tura kal lo chuan sing 1 chiah zel an la thei a. Sipai lamah erawh ral rama kal leh kal lo te pawhin thla khatah Kyat sing 3 an la tel vek tho a ni.
Khit Thit media tarlan danin, hetianga military council-in sipai leh police ho hlawh a punsak takah chuan thla tin military budget chu Kyat billion 10 chuangin a pun belh dawn a, ram chhung economy tluk chhiat vek hmaa sum awm ang anga sahimna zawnga inven tuma hmalakna mai niin a tarlang.
