Spetember ni 20-a press conference neihnaah military council thupuangtu sipai General Zaw Min Thun chuan NUG, CRPH, PDF lam tang zawnga thuziak, thlalak leh video post-tute chu criminal section 124 (B) hmanga thubuai siamsak an nih tur thu leh kum 3 atanga kum 10 thleng tantir theih leh pawisa chawitir theih an nih thu a sawi.
Military council chuan Revolution pawl te chu engti kawng zawng emaw pawha a thlawp zawnga thil tih, ziak, tanpuina pek leh tarlanna a awm a nih chuan Anti Terrorist Act, ram zahawmna tihbawrhbanna dan hmanga thubuai siamsak an nih tur thuin vauna an tichhuak a.
Chutianga an sawi chhuahna chhan chu mipuite chu Online atanga an enthlak reng thu leh chutianga ti thenkhatte chu tun hma atanga man an nih thin thu a peh hel zawnga an tarlanna a ni.
Myanmar ramah mipui tam zawk hman rim ber Facebook-a mipuite thusawi, ngaihdan tarlan leh an share te chu sipai lamin an lo enthla reng thin a.
Chu mi chungchangah zir chiangtu pakhat Ko Ko Maung chuan, “Anni chuan an enthla reng a, chanchin dik lote an thehdarh a. Revolution-a telte chanchin an en a, niin an enthlak thin a ni. Hriat lawk a nih chuan pumpelh a tha,” tiin a sawi.
Military council sipaiten thuneihna an lak hnuah ram chhung inrelbawlna chu kawng hrang hrangin kal pui tum mahse, dodalna leh duh lohna chu hmun hrang hrangah a la chhuak zel a, chungte tudawl turin hmun hrang hrangah inmanna loeh innghaisakna chu a thleng mek bawk a ni.
