Military Council ten sorkarna an lak hnu, kum khat leh a chanve hnu hian Jet Fighter-in tum 240 vel an Bomb tawh a, mipui 200 chuang an boral tawh thu NUG chuan an thuchhuahah an tarlang.
October 23 zan khan KIA Brigade 9 ten Anangpa (A Nan Pa) khuaah KIO din champha kum 62-na an lawm tumah Military Council ten Jet Fighter 4-in an bomb a.
Military Council ten an beihnaah hian Artist thenkhatte leh mipuite an boralna chungchangah NUG chuan an thuchhuahah an tarlang.
KIA sipai tiamin Kachin zai thiam lar mi 50 vel an boral a, hliam mi 100 vel an awm thu Hpakan (Pha Kant) khawpuia tualchhung mi pakhat chuan a sawi.
NUG sorkar chuan heng boral ta te hi an hmathatna tur leh international dan anga hma an lak dawn thu an sawi.
Kum 2022 September 16 khan Sagaing Region, Tabatin (Di Pe Yin) township, Leiyetkone (Let Yet Kung) khuaa School-ah Military Council ten Jet Fighter-in an beihnaah naupang 7 tiamin mi 14 an boral tawh.
Hetia thla khat a liam tawh hnuah mipui awm khawmna Concert-na hmunah an Bomb leh avangin mipui an boral nual a. Heng hi thil rapthalk tak a ni tiin NUG chuan an thuchhuahah an tarlang.
Military Counci-te hian mipuite tihchimit tum vanga bei liau liau an ni a. Hemi chungchangah hian UN leh ram hrang hrang ten action la turin an ngen thu an tarlang bawk a ni.
Kachin State Military Council thupuangtu Immigration Minister U Win Ye Tun chuan KIA Brigade 9 ten Anangpa khuaa an bomb chungchangah hriat chian a ni lova, hliam tuarte tan a tul angin kan tanpui ang tiin RFA Media a hrilh a ni.
