State counselor Daw Aung San Suu Kyi chhuah zalen tura UN security council-in thutlukna a siam leh house arrest zawkah dah tura a ngenna chu sipai hotu Min Aung Hlaian a pawm hmel loh thu Naypyidaw sipai lam source-in Khit Thit Media a hrilh a ni.
Mipui hruaitu Pi Suu Kyi chu kum 33 tang turin an chung thu rel fel a nih hnuah house arrest-a dah leh mai a rinawm thu sawi ni mah se, Min Aung Hlai chuan chutiang zawnga a ngaihtuah loh thu leh a pawm loh mai bakah phuba lak chakna a neih zawk thu hriat a ni a.
Naypyidaw source chuan, NLD sorkar laia Pi Suu Kyiin sipai hotu a en dan leh national level-a thil tih ni khuaa dihmun pawimawh a pek lohna te chu Min Aung Hlai chuan a helh hle a, December ni 30-a Pi Suu Kyii chung thu rel fel a nih hnu phei chuan a chanchin chu military council chhungah sawi zui a nih vek tawh loh thu leh house arrest-a dahna tur chance pawh a tlem hle thu’ a sawi a ni.
Pi Suu Kyii chungchang hi Home Minister-in Min Aung Hlaia hnenah direct-in report a pe thin a, a tul angin an pahnih chiahin thu an rel thlu thin a. Tuna hriat theih chinah Pi Suu Kyi chu Naypyidaw jail atangin hmun dangah sawn chhuah tum a ni a. A hmun erawh hriat chian a la ni lo. House arrest-a dah tumna a awm lo niin, Naypyidaw lama thulakin a tarlang bawk a ni.
Military council-in kum 2021 February ni 1-ah ram chhung thuneihna lain, mipui thlantlin mipui sorkar hruaitu state counselor Daw Aung San Suu Kyi leh President U Win Myint bakah hruaitu lawk tak takte chu manin thubuai chi hrang hrang a siamsak a. A tawpah Pi Suu Kyi chu kum 33 jail tang turin a chung thu a rel sak a ni.
