Kumin August thlaa Military council ten inthlanpui an buatsaih tur chungchangah Chin State township thenkhatah chhungkaw awm zat list leh chhungkaw list (Eing Thong Suh Sayin) lain in tin an luh chhuah thu hriat a ni.
Chin State khawpui Halkha khawpuiah January 13 khan Police, Military council sipaite leh Non-CDM ten mihriang awm zat list an lak thu Halkha khuaa tualchhung mi pakhat chuan a sawi.
“Myothit (Miauh Tit) Ward-ah Non-CDM, Police te leh Military council sipai ten mihring awm zat list an lakna hi ni 3 a ni tawh a. A chhehvelah an duty bawk a, kan vote duh loh pawhin min vote luihtir an tum hmel, a fair lo khawp mai” tiin an sawi.
Falam khawpuiah Military council sipaite leh Administration ten in tin lut chhuaka chhungkaw tin hming list an lak chungchangah Falam khuaa tualchhung mi pakhat chuan a ngaih dan heti hian a sawi.
“In tin lut chhuakin chhungkaw tinah hming list an la a, in duh loh chuan nangmahni thu. Vote thlaknaah in duh thu a ni a, in vote ngei tur a ni tih ang lam hawiin min zawt a ni ber mai” tiin a sawi.
Hetiang vek hian Military council ten Matupi khuaah chhungkaw list endikin hming list an lak thu hriat a ni bawk.
CDF te chuan Military council ten inthlanpui an buatsaih tur chungchangah an rem ti lo hle a, Military council-te nena in hnamhnawih reng reng na taka an hrem dawn thu, thu an chhuah tawh a.
Janaury 13 khan Halkha khawpuia hming list an lak tumin police pawl te CDF ten an kap a, police pakhat a thi a, mi 4 an hliam a. Halkha khawpuiah security an uluk thu hriat a ni bawk.
Military council ten inthlanpui an buatsaih tur chungchangah January 9 atangin ni 31 thleng hming list an lak dawn thu hriat a ni bawk.
