Chin State, Falam khawpuia inkahnaa a huhoa an man, an chhuah tawh hnuah mi 5 te zawt fiah turin an la hren mek thu hriat a ni.
“Zawh fiahna awm lovin ni 14 chhung an hreng tawh a, thubuai an awrhtir dawn nge, eng mah an la sawi lo, thu khrihkhan a awm lo chuan February 2-ah an chhuah ang” tiin Falam khuaa tualchhung mi pakhat chuan a sawi.
An la hren tak mi 5 te hi kum 24 mi Salai Ngun Sui Thang, kum 60 mi Pu Tin Hmung, kum 61 mi Pi Ram Nuam, kum 57 mi Pi Neih Kim Par leh Salai Hrang Lian Ual te an ni a. Heng mi te hi an awmna bul hnaia silai mu kawr an hmuhna leh an inkahna bul hnaia awm te an nih thu hriat an ni.
Heng an hren tak chhuah nan hian Falam khuaa kohhran hrang hrang, Pastor te leh khaw nu leh pa te bakah thuneitu hrang hrang ten mawhphurhna an lak nual thu hriat a ni. An mi man te hi an chhung te nen an la inhmuh rih loh thu hriat a ni bawk.
January 18 chawhnu khan Falam khua, Fartawk Ward, School-a duty police te CNA ten an beih avangin a chhehvela tualchhung mi 24 an man hnuah mi 19 an chhuah leh a, mi 5 an la chhuah rih lo a ni.
