Chin State, Matupi township Ngalai khuaa CDF-Matupi camp. January 15 khan Military council sipai ten an beihnaah tualchhung mi 2 an man a, sawisak hnuah an thah thu CDF-Matupi information-a thuneitu Aron chuan a sawi.
Social Media danga an tarlan dan chuan tualchhung mi 6 boral niin an tarlang a, mi 2 an thah thu hriat chian a ni. Heng mi 2 an thah tak te hi Pu Lap Lian leh Pu Van Bik te a nih thu hriat a ni.
An thah tak Lap Lian hi Mizoramah an raltlan a, Ngalai khuaa a kir leh hnu lawkah Military council sipai ten an man hnuah an that a, ni 15-a boral ta CDF sipai te nen an hal thu hriat a ni.
Hetiang vek hian Van Bik pawh Military council sipai ten thlanmualah an that a. A kut hnungkhirh a, an vuakna hnuhma te, a awma silai kahna te leh a nghawng an zaisak thu CDF-Matupi, information-a thuneitu Aron chuan a sawi.
Tun dinhmunah hian Ngalai khua hi CDF-Matupi ten an la thunun mek thu hriat a ni a. Nikum pawh khan Military council sipai ten tualchhung mi 9 an thah bakah a khawpumin an tlanchhe tawh a ni.
