Sagaing region, Homalin township, Swepyiaye khuaa Military council camp, tualchhung PDf tangrual ten February 1, tuk khan an kah rawn thu tualchhung PDF thuneitu pakhat chuan a sawi.
“Military council sipaite leh Phyusawhti pawl ten khawchhung luh chhuahna kawngpui 3, a dan chatna hmunah February 1 khan kan kap a. Camp 3 kan luhchilh a, an tlanchhe vek a, khawchhung zaa 90, PDF ten ka laksak thei a ni. Chawhnu dar 3:00 velah Mi35 Thlawhna vawi 3 a rawn thlawk a, vawi 3 a bomb a ni”
Swe Pyi Aye khua hi khaw changkang tura ruahman mek a ni a, Homalin khua atangin mel 25 vela hla a ni a. Sagaing region chuanhnuai Monywa (Mung Zua) atangin Sagaing chuanchung Chindwin thupui atanga buhfai phur kalnaa an tlawh ngei ngeina khua a ni bawk a.
Swe Pyi Aye khua hi Lawng hmanga ei in phur luh chhuahna hmunpui pakhat a nih angin Myanmar Military council-te chet velna hmunpui a ni a. He khua an kah rawn chungchangah PDF thuneitu pakhat chuan heti hian a sawi.
“Swe Pyi Aye khua hi keini tan pawh Military tan pawha sumdawngte inkal pawhna hmun laili, tuipui kawng 2 pal tlangna hmunpui a ni a. Thil fel lo pakhat awm chu Thingluang tawlhte leh rangkachaka sumdawngte leh Military council te dan lova an thawh dun avanga kan beihna pawh a tel bawk a ni”
He inbeihna avangin Swe Pyi Aye khawpum thaw deuh an khaw hnaihah an tlanchhuah vek thu Swe Pyi Aye khuaa tualchhung mi pakhat chuan a sawi.
“Kan dinhmun chu khirh tak a ni, keini pawh kan tlanchhia a. A khawpumin khaw thenawmah kan awm hlawm a, an awmna khawchhung gate awmna hnaih, tuipui kam chawlhna hmun camp pakhat chauh a bang tawh a. A dang zawng chu PDF ten kan laksak vek a ni”
Sagaing region chuanchung atanga pal tlang Swe Pyi Aye khuaah hian Myanmar sipaite thlawptu Phyusawhti leh Chindwin tupui ni tlakna lam tuipui kamah Shan Ni sipai SNA Brigade 891 te an awm thu hriat a ni bawk.
Tun dinhmunah hian Military council, Phyusawhti pawl leh SNA tangkawp ten Swe Pyi Aye khawchhung tun din leh nan an inpuahchah mek avangin boruak a sosang zel theih a nih thu tualchhung PDF pawl ten an sawi.
In kah thut theih a nih avangin Swe Pyi Aye leh Homalin khaw inkar, Swe Pyi Aye leh Phaung Pin khaw inkar, inkal pawhna tuipuiah tu mah kal lo turin tualchhung PDF pawl ten mipuite hnenah hriattirna thu an tichhuak a ni.
