Mandalay region, Madaya township Marabin khuaa tualchhung mi 20 vel chema vauin February 10 khan Military council sipai ten an man thu PDF leh tualchhung mipui ten an sawi.
February 9, tuk khan Military council sipaite leh PDF te an inkahnaah tualchhung mi 40 vel Military council sipai ten an man niin an sawi.
Hemi ni vek hian kum upate leh mi thenkhatte an chhuah nual a, mi 20 vel an la khung hran thu an sawi bawk.
Military council sipai 30 rual te an operation-naah Pyin Oo Lwin (Pin U Lun) khuaa NUG PDF Sky leh PDF ten Madaya township, Pu Wa Myauk khuaah an kah rawn a ni.
Hetia an inkah hnu hian Military council sipai 70 rual ten rawn pui lehin tualchhung mi an man thu PDF sipai pakhat chuan a sawi.
“Pu Wa khua an rawn luh hian kan lo kap nghal a, an hliam nasat avangin an rawn pui a. Hetia an rawn puih hian an sipaite leh mipuite an man khawm a, ralthuam lian leh te an kah chiam a, mipui man te an tel avangin kan hnungtawlhsan ta a ni”
February 10 khan Military council sipai operation ten Taw Pu khua leh Marabin khuaah buk an khuar a, eng mah an che tawh lo tiin an sawi zui bawk. An inkahna Pu Wa Myauk khua leh Marabin khua hi mel 2 vela inhlat a ni.
He inkahnaah hian Military council sipai 13 an thih thu PDF ten an sawi na a, RFA Media ten nemnghehna chiah an la nei lo.
He inbeihna chungchangah hian Sagaing region Military council thupuangtu economy Ministry U Thein Hti, RFA Media-in a phone-naah chhanna a awm rih lo a ni.
Marabin khuaa buk khuar mek Military council sipai ten February 9 khan a khaw chhehvelah ralthuam lian an chelek chiam avangin Sin Kone khuaa Pe Hmaw-ah bomb a tla a, chenna in 2-ah kangmei a chhuah thu tualchhung mi ten an sawi.
Ralthuam lian kah chhuah avangin Sin Kone khuaa kum 50 mi nu pakhat leh Bawng bakah Lawi a hliam thu tualchhung mi ten an sawi bawk.
