Chin State, Paletwa township-ah a ralmuan tawh avangin raltlante an chenna ina kir leh turin February 10 khan Military council ten thu an chhuah thu hriat a ni.
Paletwa township General Administration office atangin thupek an chhuah thu Football khelmual camp-a raltlan zinga mi pakhat chuan a sawi.
“Kir duh mah ila, kan haw ngam lo, Paletwa khawchhungah in sak an phal an ti a, an thuchhuah pawh a mumal lo. Camp an thunun bawk angin a lang a, khawiah nge kan awm dawn tih pawh kan hre lo” tiin a sawi a. Haw mah ila, bomb kam a awm nual bawk si a, ei in leh silh leh fenah harsatna kan tawk bawk” tiin an sawi zui bawk.
Paletwa khuaa raltlan mi pakhat chuan “Kan harsatna ber chu haw leh dawn mah ila, kan hnathawhna ber tur Lo leh leilet hmunah bomb an kam nual bawk si a. Ei in leh silh leh fenah kan harsa dawn a, nunna tan a hlauhawm bawk si avangin kan kir ngam lo a ni” tiin a sawi a ni.
Paletwa township-ah kum 2019 khan Military council sipaite leh Akaran Army te inkahna avangin Chin, Khumi, Thet, Dainet leh Rakhine chi peng raltlan mi 7000 vel leh raltlan camp 20 chuang an awm tawh a ni.
Paletwa khuaah hian Field-a raltlan camp te, RC-a raltlan camp te, Agiculture hmuna raltlan camp te, school hmuna raltlan camp te leh Wu Tu Da raltlan camp tiin raltlan camp hmun 5-ah raltlan mi 3000 chuang an awm thu hriat a ni.
Paletwa township-a raltlan te hi khawvel ei in chhawmdawltu pawl (WFP) ten an chhawmdawl zel a, heng bakah an theih ang tawkin hna an thawh thin thu hriat a ni bawk.
Raltlante an haw kir lehna tur chungchangah Paletwa township Administrator phone-a an zawhnaah chhanna a la awm rih lo a ni.
