Tualchher silai nena bei hmasatu Chin mipui te leh revolution beitu ten hma la zel turin Chin National Day, kum 75-na champha Daimond Jubilee, February 20 khan NUG Acting President Duwal Shila chuan a fuih thu hriat a ni.
February 20, Chin National Day, kum 75-na champha Daimond Jubilee-ah Interim Chin National Consultative Council (ICNCC) te huaihawtna online-a an meeting-naah NUG Acting President Duwal Shila chuan a sawi a ni.
“Kum 2 liam ta Min Aung Hlaing-a khaihhruai Military council ten thuneihna an lak hnu khan Chin mipui ten an hnam dan anga tuaichher silai hmangin an hmachhawn hmasa ber a. Hei hi an huaisen vang kan tithei ang. Hei aia pawimawh zawk chu Chin mipui te hian engtiangin nge Democracy hi an mamawh zawk tih hi a ni” tiin Duwal Shila chuan a sawi a ni.
Tun dinhmuna kan en chuan Chin mipuite leh revolution beitu ten an tuar nasa hle tawh a. Chin State pum pui hi CNF/CNA leh CJDF te khaihhruainain CDF ten an thunun vek thu Duwal Shila chuan a sawi.
“Military council te hneha zalenna thar Federal Democracy din turin Chin mipui ten kan beih a ngai a. Chuvangin Chin hrin fa kan nihna angin zalenna famkim kan neih a pawimawh a ni” tiin NUG Acting President Duwal Shila chuan a sawi bawk.
Ni khat khatah Chin State-in zalenna famkim a hmuh hunah chuan Zoom meeting nei tawh lovin awm hmunah Chin National Day hlim takin kan hmangho tawh dawn a ni tiin Acting President Duwal Shila chuan a sawi zui bawk a ni.
Kum 1948 February 19-22 thleng khan Chin State, Falam khawpuiah Independent lawm nan tiin mipui 5000 chuang an kal khawm a. Democracy a nih theih nan tiin Chin palai ten vote hmangin thutlukna an siam a.
Chin mipui te leh palai kal khawm te denchhanin kum 1950 October 9 khan inhmu khawm lehin February 20 hi Chin National Day tiin lungrual takin an nemnget ta a ni. A kum leh 1951 atangin ram chhung leh pawnah Chin National Day hi an hmang ta a. Kumin 2023 hi a kum 75-na Diamond Jubilee a ni bawk a ni.