Chin State, Matupi khuaah thla 2 chhung phone a hman theih tawh loh hnuah tun hnai lawk atang khan hrui thlun (Landline phone) phone an bun leh tawh a ni.
Mi thenkhat ten sum zawn nan an hmang a, phone hmangtu hnenah minute 1-ah Kyats 100 an bill thin a. Heng avang hian hman ni lawk khan Military council ten chhungkaw tan chauh hman phal a ni tiin an hriattir hlawm a, thupek anga zawm loh an awm chuan phone laksak a ni ang tiin an vau thu hriat a ni.
Matupi khua, 8 pengthuama Phone pakhat pawh hmanni lawk khan Military council sipai ten an laksak tawh thu tualchhung mi te hnen atanga hriat a ni.
“Phone bun man chawi te pawhin phone hman man bill an khapsak bawk sia, an sum duh vang a ni. Military council sipai ten Ward pakhatah landline phone pakhat chauh an dah a. Henga an sum hmuh te hi an hui vek ang a ni” tiin khawchhunga mi pakhat chuan a sawi.
Nakin lawkah chuan Military council sipai ten Matupi khua, Ward pakhat zelah land-line phone pakhat theuh dah a tum a, mipui ten man chawiin an hmang tawh ang an tih thu hriat a ni bawk.
