Sagaing region, Mingin khaw kiang, Chindwin (Chin Duin) tuipui kama awm Pathulone (Pa Thu Lung) khuaa buk khuar, Military council-te leh PDF te ni 3 chhung an inkahnaah tualchhung mi 50 vel Military council sipai ten an man a, tun thleng an la chhuah rih loh thu tualchhung mi te hnen atanga hriat a ni a. Tun dinhmunah boruak a la sat hle thu PDF ten an sawi.
Sagaing region, Mingin khua atanga mel 3 vela hla Chindwin tuipui kama awm Pathulone khuaah February 18-ah Military council sipai ten buk an khuar avangin PDF nen an inkap a. He inkahna avangin February 20 chawhnu khan khawchhung mi 50 chuang Military council ten an man a, tun thleng an la chhuah rih loh thu Pathilone khaw kianga tualchhung mi pakhat chuan a sawi.
“Tualchhung mi te ramhnuaiah kan tlanchhia a. A then an dang bet a, an man bawk a, kum 57 mi leh naupang pawh an zuah lova, tun thleng an la chhuah rih lo” tiin a sawi.
Military council sipai ten tualchhung mi an man te hi PDF ten an hre chiang hle a. VOA Media ten an man zat leh an man chhan an la hriat chian loh angin Military council ten pawn an thuchhuahah an la larlang rih lo bawk a ni.
February 18-20 chawhnu thleng khan vawi 3 an inkap a, tunah pawh boruak a la sosang hle a. He inkahna chungchangah Mingin PDF thuneitu pakhat chuan heti hian a sawi.
“Mingin khua atangin Pathulone khuaah buk an khuar thu kan hria a, kan hriat angin February 18-20 thleng kan luhchilh nghal a, kan inbei nasa khawp mai” tiin a sawi a ni.
Heng bakah hian Military council-te thlawptu Phyusawhti awmna pawh PDF ten an kap bawk a. PDF te thununna hmunah Military council ten khawchhung then fai hna tawkin operation an nei niin PDF ten an ngai bawk a ni.
