February 22 zan khan Sagaing region huam chhung Swebo , Watlet , Ayataw township, township 3-ah Military council dan section 419 angin Martial Law an puang a. Hetia an puan tak avangin township chhunga mipui veivak te an harsat thu tualchhung mi ten an sawi a ni.
Martial Law an puan atangin zan 6:00 atangin zing dar 6:00 thleng chauh veivah hun an phal a, tualchhung mipuite veivah an harsat thu Swebo khawpuia mi pakhat chuan a sawi.
“Hetia an tih avangin Thingtlang khua atanga zing dar 4:00 vela Bazara thlaihnah zuarte tan harsa an ti hle a. Industry zone-ah chawhnu dar 7:00-ah chauh hna an bang thin a, Chawhnu dar 6:00 a rik tawh hnuah chuan an remchang tawh lova, Swebo khawpui atanga Myitkyina (Mit Chi Na) khawpui leh Yangon khawpui kal tur chuan zing dar 6:00-ah chauh a kal theih avangin hun an awh rei hle a ni”
Hetia Martial Law an puanna chhan chu khawchhung a zalen theih nan tiin an thuchhuahah an tarlang a ni.
Martial Law an puan atang hian Military council sipai an chet nasat zual thu tualchhung mi pakhat chuan heti hian a sawi.
“Hetia an tih avangin ziaawm turah an ngai a ni mai thei, tun hma aiin a ralmuang lo zawk a. An tih angin zing dar 6:00, zan dar 6:00 an ti a, a him lo zual. Mipuite an fimkhur anga an hlau ang tihna ang a ni. Mipui ten tun hma anga an tihduhna duh lovin an do ve bawk a ni. Tunah chuan mipui ten hlauhthawnna kan nei lo. Kan nih ang angin kan hmachhawn dawn a ni” tiin a sawi a ni.
Military council ten thuneihna an lak kum 2 hnu February 2 khan Sagaing, Magwe, Chin State, Kayin State, Mon State, Thanintari region, Pago region, region leh State 8-a township 37-ah Martial Law an puang a. Hemi hma hian Chin State Mindat leh Yangon region township 6-ah Martial Law an puang tawh a. Tun hnaiah Sagaing region township hmun 3-ah Martial Law an puan leh avangin Myanmar ram chhungah township 47-ah Martial Law an puang tawh a ni.
Myanmar ram chhung township 330 awmnaah township 198 kan thunun tawh a, a dang township 132 hi hma ka la mek tiin Military council ten a sawi a ni.
