Military council ten thuneihna an lak, kum 2 hnuah Chin mite zingah human right zah lova an sawisak leh kum tling lo an pawngsualte tiamin Chin mi 380 chuang an thah tawh thu Institute of Chin Affairs ten an thuchhuahah an tarlang a ni.
Chin hruaitu ten an chhinchhiah dan chuan Military council ten pawi sawi lo Chin mi, kum 2021 khan mi 164, kum 2022-ah mi 195, kum 2023 February 28 thleng khan mi 24, an vaiin mi 383 an thah tawh thu hriat a ni.
Heng an thah tawh mi 380 chuang zingah Chin revolution zingah mi 230, tualchhung mi 120 bakah kum tling lo mipa naupang kum 19 mi leh hmeichhe naupang kum 5 mi, kum 6 mi leh kum 7 mi te an tel a, kohhran upa leh Pastor mi 4 an sawisak hlum thu ICA chuan a sawi a ni.
ICA Assistant Director Salai Van Sui San chuan “An thih dan a inang lo thluah mai. A then bomb kam rah puah avang te, pawngsual avang te, inven nana tawktarh avang te, Thlawhnaa an bomb avang te leh Tan ina an thah avang te an ni hlawm” tiin a sawi a ni.
Military council sipai ten Chin hmeichhia mi 4 a huhova an pawngsual hnuah kum 15 mi hmeichhe tleirawl an thah thu ICA chuan a sawi a.
Heng bakah hian kohhran upa leh Pastor 4 an thah bakah kohhran building 60 aia tlem lo Military council sipai ten an halchhiat thu Chin mipui hruaitu ten an sawi a ni.
Chin State-ah Military council sipai ten tualchhung mipui 56 manin inven nan an tawktarh hnuah a then an that a. Military council ten thuneihna an lak hnu hian Chin mi 900 chuang an man tawh a, a then Jail-ah an khung bawk a ni.
Chin State-ah hian raltlan mi 90000 an awm tawh zingah Mizoramah mi 40000, Manipur-ah mi 15000 chuang leh Delhi India State dangah mi 10000 chuang an awm tawh thu hriat a ni.
“Military council sipai ten Chin State-a mi nuai 5 vel awmnaah human right dan bawhchhiain tualchhung mipui an that a, an sawisak mek” tiin ICA chuan an thuchhuahah an tarlang a ni.
Military council sipai ten hetia mipui an sawisaknaah ram hrang hrang ten hremna la vat turin Institute of Chin Affairs ten an ngen a ni.
