Sagaing region, Min Mu township, Let Ka Pin khuaah Military council sipai ten an luhchilh a, khaw thenkhata an man te a huhova thah an rin thu tualchhung mipui ten Yangon Khit Thit Media a hrilh a ni.
March 5, chawhnu dar 5:00 vel atang khan Minmu township, Let Ka Pin khuaah Military council sipai ten pawl 2-in an luhchilh a. Ralthuam lian an kah chiam hnuah tualchhung mi 200 vel an man thu hriat a ni.
March 6, tuk khan Military council sipai ten an man zinga tualchhung mi 3 an kap hlum a, chenna in 3 an halchhe bawk a. Khawchhunga chenna in an rawk chiam hnuah tualchhung mi an man te a huhova that vek an rin thu hriat a ni.
“Tualchhung mi 200 vel an man zinga mi, thlang chhuakin an that a. Heng Military council sipaite hian TaTaing khuaa tualchhung mi 17 an that tawh bawk. Tualchhung mipuite an tlanchhe hlawm a, a zat hriat chian a ni lo. Military council sipai ten khawchhung an la chhuahsan lova, tualchhung mipui hliam an awm nual” tiin tualchhung mi pakhat chuan a sawi a ni.
Sagaing region, Tataing khuaah March 2 khan Military council sipai ten tualchhung mi 17 an man a, hmeichhe 3 an pawngsual hnuah an that a, mipa 14 an sawisak hlum thu hriat a ni.
