Myanmar, Taninthari (Ta Nin Ta Ri) region lamah Military council te an chet nat thin avangin Thai leh Myanmar ramri Ranong State, Crab Buri ramri, Thai lamah raltlante an tlan ruk thin avangin Thai No.25 Battalion commander colonel Kumipat Boonruangkhao-a pawl ten March 12-ah a hmunah an endik hnuah security an dah belh thu hriat a ni.
Myanmar, Tanintari region-ah Myanmar Military council sipai te leh KNU tangrual te nen inkah buaina a awm apiangin tualchhung mipui te Thai leh Myanmar ramri, Ranong State lamah raltlanin an lut ru thin a. Heng avang hian Thai leh Myanmar ramri Crab Buri hmun ramri tluanah Thai sipaite an dah belh nual a, darkar 24 chhung an duty a ni.
An duty-na hmunah hian Bukte an sak belh nual a, an check uluk hle thu Thai chhim lama innghat, Education and Development Foundation, Labor affairs thuneitu U Min Oo chuan hetiang a sawi.
“Kar hmasaa Tanintari region-a inkah buaina avangin a za tel Ranong hmunah an raltlan a. He thil thleng hi kum zabi hun chhungah a vawi khatna a ni a, Thai lamah an tlanchhiat ruk avangin an duty uluk hle a ni” tiin a sawi a ni.
March 12 khan Thai No.25 Battalion commander colonel Kumipat Boonruangkhao-a pawl ten a hmunah endik a nih hnuah security dak belh tur a nih thu leh raltlan te chhawmdawlna chungchang an sawi ho a. Hmanni lawk khan inkahna buaina awm tawh lo mah se, an ngaih a that rih loh thu colonel Kumipat Boonruangkhao chuan a sawi a ni.
“Ani hi helai huam chhunga thunei ber a nih angin a rawn endik a, raltlante eng tin mah a ti hran lo. An awmna te an siamsak hnuin an haw leh mai thin a, hmanni lawk pawh khan raltlante tan awmna tur leh ei in tur a pek hnuah a haw leh mai a ni”
Thai leh Myanmar ramri Turk State-ah inkah buaina a awm apiangin Thai lamah an rlatlan tlangpui thin a. Tanintari region atanga Ranong lama tuna raltlan te hi kum zabi chhungah a vawi khatna a nih thu tualchhung mi ten an sawi a ni.
Tun hnai lawk atang khan Myanmar, Tanintari region lamah a ralmuan loh avangin Thai lam ramri-ah security an dah uluk sawt hle a, ram pahnih ramri pawh duty tur an dah belh nual a ni.
