Sagaing region, Monywa (Mong Zua) township, Tha Nong Taw Taung khuaah Military council sipai ten March 15 zing dar 6:00 vel khan chenna in an hal a, khawchhung duty thalai 12 an man zingah thenkhat an thah thu tualchhung mi ten Yangon Khit Thit Media a hrilh a ni.
Monywa towmship Taw Pu khuaa Phyusawhti pawl leh Military council sipai ten Tha Nong Taw Taung khua an luhchilh a, khawchhung an hal hnuah khawchhung thalai duty mi 12 an man zingah mi 5 an thah thu tualchhung mi ten an sawi a ni.
“Inkah buaina awm hran lovin khawchhung an hal a, Tha Nong Taw Taung khaw kianga Pauk Pin khuaa mi te an tlanchhuak nual” tiin tualchhung mi pakhat chuan Yangon Khit Thit Media a hrilh a ni.
Military council sipai ten Phyusawhti pawlte awmna khua Yaw Pu khuaah innghatin a chhehvel khua an hal chiam a. March 15 tuk khan Monywa-a Kah Mah Yah atangin Military council sipai rual tam tak ten motor 3-a chhuakin, Monywa khua immgration office hlui lamah an luhchilh thu Area 71 PDF Monywa-a thuneitu pakhat hnen atanga hriat a ni.
“Taw Pu khuaa Phyusawthi te, he lama operation an neih apiangin an tel fo thin a. Tun tum chu mipui ei in tur an ruksak nual a. Operation pawl 2 an neihna turah hriattirtu an awm a ni ang, duty pawl zingah mi 12 an man a, tu te pawl nge tih hriat a ni lo” tiin Area 71 PDF Monywa pawla thuneitu pakhat chuan Yangon Khit Thit Media a hrilh a ni.
Military council sipai ten an hal tak Tha Nong Taw Taung khua hi in 200 chuang nufa an ni a. Military council sipai ten a khaw chhehvel an luhchilh avangin khaw 10 chuanga tualchhung mipui te an tlanchhiat nual thu Monywa news chuan a tarlang a ni.
“Tunah chuan PDF te harsatna pakhat chu Military council sipai ten operation an neih hian motor an hman theih tawh lova, huan kawmkar atangin kan put ru tawh a. Bomb kam hmang leh mipuite venna turah a ruka thiltih a harsa tawh a, an kalna hmuna an hmuh te an man zel” tiin PDF thuneitu pakhat chuan a sawi a ni.
