Magwe region, Thilin township, Thilin leh Gangaw khawpui motor kawnga khaw awm te Military council sipai ten an suartluan avangin tualchhung mipui pawi sawi lo mi 5 an man hnuah an thah a, In 8 an hal chhiat bawk thu Yaw Revolution Army Thilin-a Takhin Zaw chuan Yangon Khit Thit Media a hrilh a ni.
March 15,16 khan Military council sipai ten Thilin township, Swe Khong Taing khuaah luh chilhin khaw hmu lo raltlan kum 80 mi Daw Khin Pu chu a chenna in chawpin an hal hlum a. Thaing Taing khuaa rilru lam chiang lo kum 55 mi U Tan Thui leh Lo feh haw kum 70 mi U Ka Kyaw te pawh an thah thu hriat a ni bawk.
March 18 pawh khan Thilin township Si Min khuaa rilru chiang lo kum 40 mi U Tan Min Aung leh U Bo Tin te Military council sipai ten an sawisak hlum thu hriat a ni a.
Hemi ni vek hian Si Min khua atanga raltlan pawl 10 zirlai Tv. Pyi Phyu Kyaw (Pih Phiu Chaw) pawh Taw Ma kawng tawn tirhah kut hnungkhirha an thah hmuh a ni a, a thattu hriat chian a ni lo.
“Mi 5 te Military council sipai ten an that chiang a, pawl 10 zirlai ruang an hmuhna hi Military council sipai awmna atanga mel 6 vela hla a ni a, kut hnungkhirha a thihna chungchangah chhui mek a ni” tiin Yaw Revolution Army Thilin, Takhin Zaw chuan Yangon Khit Thit Media hnenah a sawi a ni.
Pakukko khua atanga Kyauhhtu (Chauh Thuh) kawng, Thilin township huam chhunga Military council sipai lut Battalion 77 leh an thiante sipai rual 200 chuang motor 32 te, Gangaw District Battalion 15,16,17 (YRA Thilin) leh tangrual pawn ten an beihnaah vawiin thlengin Military council sipai 40 chuang an thi tawh a, 30 chuang an hliam a. YRA thilin Battalion 17-a company commander Kyaw Min a boral a, mi 2 an hliam a, Swe Khong Taing khuaa chenna in 8 an hal chhiat thu hriat a ni bawk.
Heng Military council sipai operation mek te hi Thilin township an pel tawh a, Gangaw township Maw Le khua velah an thlen tawh thu Yaw Revolution Army Thilin-a Takhin Zaw chuan a sawi a ni.
