Indo – Myanmar ramri hmun pakhatah Mizoram mi 3 an thah chungchangah pawi an tih thu leh Mizorama hetianga chhiatna a thleng chungchangah an tawrhpui thu Central Young lai Association (CYLA) chuan a sawi a.
Mizoram chhim lam Siaha khuaa Pi Biaksuii, Pu Bablu leh Lawngtlai district, South Lungpher khua YLA member B. Lalthafamkima te March 22 khan Mizoram leh Chin State ramri-ah tu tih hriat loh pawl ten an thah thu hriat a ni.
Hetianga chhiatna chungchangah an chhung te leh chhungkhat laina ten an tuar na hle a. Hetiang thil hi thleng tawh lo se tiin March 27 khan CYLA thuchhuahah an tarlang a ni.
Tualthattute zawn chhuah hna leh a tul anga hma la turin CYLA ten theih tawp an chhuah mek a, man an nih chuan an phu ang tawka hrem a nih thu leh sorkar thuneitute pawh theih tawp chhuahpuiin an beisei a.
Heng bakah hian Mizoram chhung leh Myanmar revolution bei mektu CDM, CDF, PDF, CNA te leh pawl hrang hrang ten hma lakpui turin CYLA ten a sawm thu an thuchhuahah an tarlang a ni.
Mizoram mi, mi 3 te March 19 khan Car-in Siaha khaw atanga Indo – Myanhmar ramri an pan laiin an chhung te nen an in be pawh thei tawh lova.
March 22 khan Chin State lamah an ruang hal hnu an hmuh hnuin March 23-ah Siaha civil hospital-ah an post-mortem hnuin an chhung ten an vui liam thu Mizoram Daily news vanglaini-ah an tarlang a ni.
Myanmar rambuai chungchangah hun remchanga laa ruihtheihthil tawlh ru an awm nual tih hriat a ni a, heng zingah inhnamhnawih ve lo turin CYLA ten mipui te a ngen a ni.
Mizoram State Lawngtlai khuaa innghat Central Yong Lai Association te Mizoram chhim lama thalai insuihkhawm pawl lian an ni a, Myanmar raltlante tana chhawmdawltu tlawmngai pawl lian tak an ni.
He chanchin lak khawm lai hian mi pathumte tualthattu nia rin te hi Chin State, Mindat khuaa CDF Aung Ling leh Zaw Oo te tiin social media hrang hrangah tarlan a ni a, The Tahan Post chuan nemngheh chiah a la nei lo.
