Kalaymyo atanga hmar lam Pyin Taw Oo (Tuingo) khaw bulah April 2 atang khan, Military council sipaite leh PDF te an inbeih thu CNO Upper Chindwin Region-UCR ten an thuchhuahah an tarlang.
Military councilte sipai ten Tuingo khua leh Minhla (Zotlang) khaw inkar Nan Ta Ka Chaung atanga tlak lama an operation lai, April 2 zing dar 8:00 khan an inkah leh thu hriat a ni a. Kalaymyo atangin Laipui an kah chhuah thu hriat a ni bawk.
March 31 atang khan Tuingo khaw bulah Military council sipaite leh PDF te an inbei nasa hle a, Military council sipai ten chung lam Thlawhna atangin an beih thu hriat a ni.
Military council sipai ten an beihna avangin Tuingo khuaa AG Biak in telin chenna in thenkhat a chhiat nual thu hriat a ni bawk.
CNO Upper Chindwin Region-UCR ten March 31 thlenga an chhinchhiah danin Military council ten an bomb kam avangin Military council sipai 10 an thi a, mi 7 te an hliam thu hriat a ni.
Military council sipai 2 hliam, kawng sira an paih te PDF sipai ten damdawiin an enkawl nghal a, thisen a chhuah tam avangin an thih zui nghal thu hriat a ni bawk.
He inkahna avangin Pyin Taw Oo (Tuingo) khaw bakah Letpanchaung, Minhla, Aung Ywa (Awng Zua), Myiauk Chaw (Miauh Chhaw), Chin Su (Chhin Suh), Chain Thar Gyi (Chhian Ta Ji) khuaa tualchhung mipui, a khawpumin a tlanchhiat nual thu hriat a ni.
