Kalaymyo hmar lam Pyin Taw Oo (Tuingo) khaw chhehvela inkahnaah Military council sipai 7 an thih thu CDF-KKG ten April 5 khan an thuchhuahah an tarlang.
Kalaymyo hmar lamah March 31 khan Nan Saung Puh khua atanga feh chhuak Military council sipai, Phyusawhti pawl te leh CDF-KKG te nen Tuingo khua Thlanmual kiangah darkar 3:00 chhung an beih thu hriat a ni a.
He inbeihnaah hian TCDF, CNDF, PDF Kalay, HNB, Cr, PDA NUG PDF, CDM Siyin tangrual ten an beih rawn a. Military council sipai ten ralthuam lian leh Helicopter-in an bomb nasat thu CDF-KKG ten an sawi.
He inkahnaa thi ta Military council sipai 7 ruang, a hmutu ten an sawi a, MA3 silaimu bawm pakhat, 5.56 silaimu tlawn 20, Chem pakhat leh hnungpuak Bag bakah hmanraw tam tak an laksak nual thu CDF-KKG ten an thuchhuahah an tarlang a ni.
CDF-KKG lamah sipai pakhat na vak lo a hliam thu hriat a ni a. April 1 khan khawchhung then fai hna an thawhnaah MA3 silaimu bawm 1, 5.56 silaimu 8 an laksak nawn thu hriat a ni bawk.
April 1,2-a Military council sipaite nen an inbeih tum khan Military council sipaite an hliam nual a, Military council sipai lamin Laipuiin an sai chiam thu hriat a ni bawk.
Tun dinhmunah hian Military council sipai ten Nyaungkone (Ngiau Kong) khuaa Monastry leh Tuingo khaw chhehvelah buk an khuar mek a. Hetia boruak a awm avangin inkah buaina a sosang mai thei tiin CDF-KKG ten an thuchhuahah an tarlang a ni.
