Chin State, Matupi leh Paletwa khaw kawng, Thebui camp-a ration pe tur Matupi khua atanga chhuak Military council sipai 150 rual te CDF-Matupi ten vawi duai lo an beihnaah Military council sipaite 73 an thi tawh a, CDF-Matupi sipai pakhat a hliam thu hriat a ni.
Heng bakah Matupi khuaa Military council sipai ten private motor ke 10 nei chi an hman luihsak pakhat bomb chhiat a ni bawk.
Thi leh hliam tuar Military council sipai ten April 3 khan Kala khuaah In 31, Wa Lan Te khuaah In 15 leh Chek in 2 an halchhe vek bakah kawng tluanin bomb an kam thluah thu tualchhung sipaite hnen atanga hriat a ni.
Inkah buaina a rei tawh hle a, tualchhung mi raltlan ten tlang kar tui luang an in thin avangin khawthalo an tam hle a. Khaw chhungah kir leh dawn mah se, chenna tur in an nei tawh loh avangin harsatna an tawk nasa hle a ni.
Inkah buaina a nasat chhoh zel an rin thu CDF-Matupi ten an thuchhuahah an tarlang bawk a ni.
