Kayin State, Myawadi (Miah Wa Di) township, Swekokku khuaa inkahna avangin Thai lamah Myanmar mi 2000 chuang an tlanchhiat thu Thai news leh mipui raltlante hnen atanga hriat a ni.
April 5, zing dar 3:00 hnu vel atang khan Myawadi township, Swekokku hmunah Military council hnuaia BGF huam chhung Swekokku, Htiwapalaw (Thi Wa Pa Law), Thi Kaw Traw khaw kiangah Revolution beitute leh Military council sipai, BGF te an inkap a, BGF camp 2, Revolution pawl ten an laksak thu hriat a ni.
An inkah hlimchhawn atangin Swekokku huam chhung tualchhung mipuite Thai lamah an tlanchhe nual a. Thai sipaite leh sorkar thuneitu ten chenna hmun an buatsaihsak thu hriat a ni bawk.
“Mihring kan darhsak vek a, Ban Huai Bong Moo 8-ah mi 400, Ban Wang Pha-ah mi 1500 kan awm a. Thai sipai ten min chhawmdawl mek a, khua a lum avangin tui thianghlim, ei in tur leh damdawi kan mamawh hle” tiin Thai lama raltlan tanpuitu zinga mi pakhat chuan a sawi.
Thai sorkar thuneitu ten Myanmar raltlante tan an mamawh tui thianghlim, ei in, damdawi leh thil pawimawh dang tanpui turin a ngen bawk a ni.
