Kum 50 liam taah khan sipai sorkarna avangin Myanmar ram a tlusawp a. Tunah phei chuan sipai sorkarna avang vekin Centre Bank bakah Bank dang thlengin harsatna an tawk a, an hal hial a nih kha.
Sipaiin sorkarna a lak hlim atangin Bank-a hnathawkte CDM-ah an luk a, Bank an khar rup rup a. Mipui ten Bank hi hawng leh ta se, an buai dawn nge, dawn lo nge tiin social media lamah titi an vawrh nasa hle a nih kha.
April ni 29 hnuah Office kai loh chuan hna atanga ban tur a ni tiin Private Bank thenkhatah chuan an kal leh ta a, sum pawh bithliaha pek chhuah a ni nghe nghe. Bank-a sum lu leh a pung nen lam thlengin lak chhuah tur a awm mumal tawh lova, mipuite an chi-aia an mangang ta, hei hi eng vang nge ni ta ang le?
Khawvelah sipai sorkarna awp ngun ber kan thenawm Thailand ramah hian sipaiin sorkarna la ngun mah se, zalen takin sumdawnna lamah an thlah dul hle a, a ram mipuiin harsatna an tawk ve lem lova, an changkang tulh tulh a.
Myanmar sipai sorkarte chuan Economy, Education, Helth Department, Social life bak Politice lam thlengin a thunun vek a, Centre Bank leh a khaihhnawih thlengin a vaihma bawk si a.
February ni 1,2021 atang khan Centre Bank-a thuneitute chu nawr chhuakin emaw an man thul, lung in an tangtir loh leh an nghaisa a, mi dang an thawhtir leh thin a.
General Ney Win-a sipai sorkar, lal hrawtna atang reng khan ram chhung sum che vel chu a hnuk atangin a thunun vek avangin mipui ten kawng dawmin an hawi hil reng mai a nih kha.
Kum 50 liam taa sipai awpnaah khan dan anga sum pai hmanna thin chu dan lovin 1964, 1985 leh 1987-ah tum 3 meuh pawisa a tithi (Demonetization) a, tuna sorkar hian eng tak rilru pu ve ang maw. Khawvel paper level-in K.35, K.75, K.45, leh K.90 te kha General Ney Win-a khan a siam chhuak a. Heng pawisa lemah hian a tirah chuan Boyoke AungSan-a lem chuantir a ni a, a hnuah phei chuan ramsa lemin a thlak leh ta a ni.
Tunah chuan Centre Bank a thunun tawh avang hian eng ang dinhmun nge kawng kan zawh dawn tih a la hriat lova. Mi pakhatin Nuai 200 a neih chuan a hlauhawm thei a ni tihthawmte hriat tur a ni ve nuai bawk nen, buaithlak ve tak a chu a ni e.
Hman deuh kha chuan sum lut chhuak, thawn leh lak velah hian Financial Transaction hmangin cash economy tia chhinchhiah thin a ni a. Pakhat lehah chuan Cash Transaction kal kan lehin tunah chuan IT hmangin online-a hman chi digital transaction chu, loh theih lovin hman a tul tawh a ni.
Tuna Myanmar-ah chuan Cash Transaction hi kan phak tawk a la ni rih mai thei a, Digital Transaction erawh chu ka la hlat deuh niin a lang. Sipai sorkarna hmasa lam kha chuan Private bank te kha ziaawm viau mah se, 2011 Democracy lamtluang kan zawh hnu atang kha chuan a changkang lehzual a tih theih ang a. Internet kan hman theih atang kha chuan ram dang nen sum thawn leh lak chungchangah digital transaction rim a rawn nam ve tan ta a. Tichuan Wave Money, Mobile banking leh eng Pay
Pay emaw Online shopping-in mipuiin an hmang ve zung zung thei ta a ni.
Nimah sela, ram chhung sumdawnna tam zawkah chuan Cash Transaction kalhmang hi an la hmang ber a. Digital transaction erawh hi chu ni tin sum che velah an hmang deuh ber thin a ni.
Ram changchanga an hman ang digital transaction a that hunah chuan token laka ATM hmanga mahni duh zat lak zeuh a ni mai tawh ang a. Bank-a intlar, sum aia awha rangkachak lei, saving box-a dah lawkna turah kan fihlim tawh dawn a ni. Tunah chuan internet lamah buaina kan tawh zel avangin Digital transaction erawh hi chu ka la hlat deuh zawng a nih hi.
Kar 2 vel liam taah khan mobile internet hmangin Bank thenkhatah hman a ni a, internet a that loh chuan a hman theih chuang lo. Hetia internet an khar hi chuan sipai tan pawh thiltih a awl bik lo, an buai ve tho tho mai.
Tunlai khawvelah chuan Private bank leh sorkar Bank-ah pawh ni se, internet leh IT hmanga chet vek a ni tawh a. A bik takin Covid lamah phei chuan hma an la chak em em a ni. Hetia sipai thluak thawl tena internet an tihchingpen fo hi anmahni tan vek a tha lo zual a nih tih hi an hre mawlh si lo.
Myanmar-ah hian kum 2000 chho vel atang khan Myanmar Universal Bank, Asia DaNah Bank, May Flower Bank leh Private Bank thenkhatah sum lamah harsat an tawk nual a. Khang hunlai kha chuan ram chhung leh mipuite sum leh paiah a nghawng thui hle a ni. Engvang nge tih chuan Bank-a sum che vel hi Crony thenkhat ten an thunun tlat vang a ni a tih theihawm e.
Tunah chuan ram dang nen cheng thleng 25% in a tla hniam a, a lak chhuah nan 10% commission-in an chan leh hi chuan 35% sen a ngai dawn ta a ni. Myanmar leh US Dollar chu inthleng thei mah se, Myanmar leh a ram thenawm te nena inthleng leh tur chuan a awlai lo leh a, insumdawn tawnna a tibuangbar zo vek a ni.
Sipai thluak thawl ten sokarna a lak atang hian ram chhung a awngrawp a. Sipai sorkarna kum 50 chhung hian ram leilung hausa ber Myanmar ram chu khawvel rethei ber ram zingah chhiar theihin a lo awm ta. Ram chhungah zalen hnualsuat a ni a, ram dangah kal mah ila, hmai a uang lova, a zahthlak hliah hliah mai a ni.
Sipai thluak thawl ten Center Bank leh Private bank zawng zawng an thunun vek avangin Bank tlusawp tur hmahruai kan tawng mek a ni. May ni 24 han bank zawng zawng kalphung pangngai anga inhawn vek tur ti mah se, impuri pawisa dah tamna ber Kanbawza leh Aya bank te chu an la inhawng chuang lo a ni.
Photo: Crd
