Kayin State, Myawadi (Miah Wa Di) township, Swekokku khuaa inkahna avangin Thai lam Thongyin tuipui kana Myanmar mi raltlan mi 8000 chuang an awm thu hriat a ni.
April 5 khan Myawadi khawpui bul Swekokku leh Thi Kaw khaw inkar Military council hnuai, ramria duty BGF camp 2, KNLA leh PDF tangrual pawl ten an beih thu hriat a ni a.
An inkah hlimchhawn hian tualchhung mi 5000 chuang an tlanchhia a. April 7 tuk thleng khan raltlan mi 8000 an chuang tawh tiin Mae Sot (Me Sauh) khawpuia Myanmar raltlan tanpuitu zinga mi pakhat chuan a sawi.
“Myawadi khaw lam atanga Thai lama Myanmar raltlante a ni telin an tam zel a, mi 8000 an chuang tawh” tiin an sawi a ni.
Tun dinhmunah hian Myanmar atanga raltlante Thai thuneitu ten ei leh inah leh thil pawimawh chungchangah an la chhawmdawl mek a. Raltlante hi mi 8000 chuang an tling thu Thai, Mea Sot khawpuia thuneitu ten an thuchhuah atanga hriat a ni.
“Ramri kana raltlan mi 8000 chuang te Mae Ramad district, Mae Sot huam chhungah kan awmtir rih a, naupang leh kum upa te an tel nual mai. Thai sorkar chuan tlawmngai pawl te nen damdawi lam chenin kan enkawl mek” tiin Thai, Mea Sot khuaa thuneitu pakhat chuan Social Media-ah a tarlang bawk.
Chuvangin tun dinhmunah hian Thai lam Myanmar raltlante tan ei in, awmna tur mamawh chi hrang hrang te a theih ang anga tanpui theuh turin an ngenna thu raltlan tanpuitute hnen atanga hriat a ni.
