Kachin State, Myitkyina (Mit Chi Na) khua Happy KTV hmuna an man KIO officer mi 13 te April 7 khan Myitkyina Court atangin kum 5 theuh lung in tang turin thutlukna an siam thu an chhung ten RFA Media an hrilh a .
Dan lova pawl dang biak pawhna dan section 17(1) case hmangin kum 2, ram tibuaitu section 52(A) case hmangin kum 3, a vaiin kum 5 theuh Jail bang zut turin an hrem thu an chhungkaw zinga hming phut pakhat chuan RFA Media hnenah an hrilh a ni.
“Kum 5 theuh Lung in tang turin an hrem a, hmuh theih pawh an ni lo. Case 2-ah kum 5 theuh tang turin an ti a, kan mi leh sa hetia an hrem hi chu rilru a nuam lo hle a, a lungchhiatthlak khawp mai”
KIO officer thenkhat te pawh kum 2022 November 12 tuk khan Myitkyina khua TatKone Ward, Swelannma (Sui Lan Mah) kawnga Happy KTV-ah an lo man tawh bawk a ni.
Hetia an man hnu hian an chhung te nen an la inhmu thei lova, an Ukil te kaltlangin ei in leh pawimawh dang an pek theih thu an chhung te hnen atanga hriat a ni.
Hemi chungchangah KIA thupuangtu Colonel Naw Bu leh Military council thupuangtu Social Affairs Minister U Win Ye Tun te RFA Media ten phone-a an zawhnaah chhanna an la nei rih lo a ni.
