Military council tan Thlawhna tui leh ralthuam tawlh lut tawh lo turin ram hrang hrang te hnenah NUG Acting Chairman Duwa Lashi La’an a ngen a.
He thu hi NUG sorkar kum 2-na a dincham function an neihnaah NUG Acting Chairman Duwa Lashi La chuan a sawi a.
Heng bakah hian NUG sorkar ten Thlawhna leh ralthuam hmanga a beih theihna tur pawh a rang lama tanpui tura a ngenngawl thu Acting Chairman chuan a sawi bawk.
Tun dinhmunah hian Military council ten Thlawhna hmangin mipuite an la bei zel a. Chuvangin mipuite an thihna lak ata an him zawk theih nan tiin Thlawhnain a beihna kara indan himna kawng inzirtirna chi hrang hrang buatsaih a nih dawn thu a sawi.
Mipui tangrual pawl hrang hrang te leh NUG sorkar bakah khawvel ram hrang hrang ten Military council ten Thlawhna hmanga mipuite an beihnaah lo hmachhawn turin leh him zawka an indan theihna turin chak taka hmalak a nih theih nan a fuih bawk a ni.
April 11 khan Sagaing region, Kanbalu township, PaZinGyi khuaah Military council sipai ten Jet Fighter hmanga an bomb-naah naupang 40, naupawm lai 24 telin mi 168 a huhova an boral thu a sawi tel bawk a ni.
Heng bakah hian mipui veng himtu pawl PDF te leh tualchhung PDF te tan ralthuam leh a kaihhnawih theihtawp chhuaha tanpui a tum thu leh raltlan mi mangang te tan pawh ei in, silhfen leh a tul anga chhawmdawl zel a nih dawn thu a sawi tel bawk a ni.
Military council puipa ber leh a kaihhruai ten an tharumthawhnaah dan pela an chetna hi khawvel ram hrang hrangah report pek zel a nih thu Acting Chairman chuan a sawi a ni.
