Sagaing region, Kalaymyo khawpuiah Military council dotu Revolution zinga tuitheh Kuta tel mi 4 te April 16 khan Military council sipai ten an man hnuah an chhung te pawh an chenna inah an man zui thu hriat a ni.
Kalaymyo, Tat U Tita Ward, Bogyok (Bu Chhok) TaDa U, Lei-ah April 16 chawhnu dar 2:00 vel khan Tuitheh Kut dotute zingah Pu Tan Soe Oo, Pi Cing Dui Kim, Pi Nin San leh Pu Moe Ko Win te Military council sipai ten an man a.
Hetia an man hnu hian Kalaymyo, Hmunlai Vengah awm Pi Cing Dui Kim te chenna inah hemi ni chawhnu dar 4:00 vel khan Military council sipai ten Motor-in an luhchilh a. Ina awm mek kum 60 mi, che sawn thei lo leh a tunu ramtuileilo an man hnuah an In, an kalhsak thu tualchhung mi pakhat chuan a sawi.
“Inah hmeichhia chauh an awm a, pa ber leh a ute hnathawkin an chhuak a, an nu ber che sawn thei lovin a ke khing khat a tha lova. A u fanu a tawng thei lo bawk a, Ina awm zawng zawng Military council sipai ten an man a, tun thlengin an la chhuah rih lo” tiin an chhungkhat hnaivai mi pakhat chuan a sawi.
Military council sipai ten eng vangin nge an man tih hriat a la ni lova, vawiin thlenga an la chhuah rih loh chungchangah an chhung te an ngaih a that loh thu a sawi zui bawk a ni.
April 16 khan Kalaymyo-ah Myanmar kum thar, Athar Thingyin (ATa Ta Jian) kutpui a nih angin Military council sipaite dodal zawnga lantir te, Military council sipai ten Motor-a an enthlaknaah mi 4 an man a ni.
