Chin State, Mindat township Circuit No. 1 Panpa khuaah Military council sipai ten Thlawhna hmanga an beihnaah kum 17 mi hmeichhe tleirawl pakhat a hliam hnuah a boral a, ani nen hian mi 3 an boral tawh a ni.
April 16 chawhnu dar 3:00, 4:00 inkar vel khan Panpa khuaah Military council sipai ten Jet Fighter-in vawi 6 an beihnaah bomb 17 a tla a. Kum 4 mi naupang 1 leh kum 70 mi nu 1 a boral a, mipa 2 leh hmeichhe 5 an hliam thu CDF-Mindat ten an thuchhuahah an tarlang a ni.
Heng bakah hian chenna in 2 a kang a, In 9 a kan ral thu an sawi bawk a. Hliam zinga nu pakhat a hliam tuar lovin April 16 khan a boral thu hriat a ni.
Military council sipai ten Mindat khawpui tinzawna chung lam leh khawmual lama ralthuam liana an beih thin avangin inven nan lei khur lai theuh turin CDF-Mindat ten April 14 khan thuchhuah an siam a ni.
Chin State-ah Military council sipai ten chung lam Thlawhnain an bei chhunzawm zel a. March 30 khan Thantlang township Khualpu khuaah leh April 10 khan Falam township Webula (Wi Bu lah) khuaa an bomb-naah naupang telin tualchhung mi 18 an boral tawh bawk a ni.
