Chin State, Halkha khawpuiah Lirthei a luh chhuah theih tawh loh avangin ei in man leh bungraw man a san chhoh zel thu tualchhung mite hnen atanga hriat a ni a.
Halkhaw khawpuiah hian Buhfai, Chhitui(Tel) leh chi bakah ei chawp thil reng reng Kalaymyo atanga phurh chhoh a ni tlangpui a. March 7 atang khan Military council sipai ten operation an neih avangin Kalay-Falam-Halkha kawngpuiah vawiin thlengin an kal thei tawh loh va, ei chawp thil leh bungraw chi hrang hrang an khaihlak mek thu hriat a ni.
Heng bakah hian Gangaw-Halkha kawngpui pawh inkahna avangin Lirthei eng chi mah an a kal theih tawh loh thu hriat a ni bawk.
March chawhnu leh April thla tir vel khan Ee-Ya-Min buhfai ip khat Kyats 80000 man a nih laiin tun hnai lawk atang khan buh thar Kyats nuai khat leh buh hlui Kyats 130000 man a ni a. LongTeHmui leh PawSanHmui buhfai ip khatah Kyats 140000-in Thawhtanni khan lei tur a awm laiin ni dangah lei tur a awm tawh loh thu tualchhunga CDM zititrtu nu pakhat chuan a sawi.
Hetiang vek hian Halkha khawpuiah Ar sa leh Sangha lei tur a awm tawh lova, Zikhlum, Antam, Anthur, Alu, Khanghu leh thlaihnah pawh rin aiin a man a san thu Bazar thin nu pakhat hnen atanga hriat a ni bawk.
“Tuk khat Barzar turin Khanghu leh Changchawr lei nan Kyats 5000 sen a ngai a, chu pawh chu mi 3 kham khawp chauh a ni” tiin a sawi zui bawk a ni.
Tun dinhmunah hian Halkha khawpuiah Petrol (92) liter khatah Kyats 5000 man a ni a, lei tur a awm tawh loh avangin Lirthei hmang an tlem sawt hle a, Kea kal an tam hle thu hriat a ni.
Hetia khawpui chhungah silhfen leh ei in man a san lai hian mipuite do zawng leh Military council- te beih laia chhiah khawn leh pek te bakah thil man to tak taka zuar lo turin khawchhung thuneituten an ngen a, an ngenna anga zawm lo an awm chuan action lak a nih dawn thu CDF-Hakha Council ten April 19 khan thupek an chhuah a ni.
