UN General Secterary hlui Ban Ki Moon chu April 24 Thawhtanni khan Myanmar atangin a thlawk haw leh tawh a. Mr. Ban Ki Moon hi April 13 Sunday ni khan Myanmar-ah a rawn zin a, Military council puipa ber Sr. General Min Aung Hlaing, Lt.General leh Defence Minister General Mya Tun Oo te nen thu an sawi ho thu Military council ten an thuchhuahah an tar lang a ni.
April 13 Sunday chawhnu khan Naypyitaw khawpuia Jasmine Hotel-ah General Mya Tun O nen an inhmu a, Foregin Minister pawh a tel thu an thuchhuahah an tar lang bawk. He an inkawmnaah hian “ Nakin hun leh zela Myanmar dinhmun hma an sawn theihna tur leh thu pawimawh takte an sawi ho” tiin an thuchhuahah an tar lang bawk a ni.
Mr. Ban Ki Moon hnathawhpui Envoy hlui pakhat chuan, hetia a zin tumna hi a rei tawh hle a, vawi tam tak thulh tawhin a hun leh ni pawh sawn zel a nih thu Rauter news chuan a tar lang a ni. Mr. Ban Ki Moon hian Daw Aung San Suu Kyi chhuah zalen a nih theih nan a ngen fo thu a thawhpui Envoy hlui chuan a sawi a. Mr. Ban Ki Moon hian Daw Aung San Suu Kyi hmuh tuma a ngennaah a hlawhchham a, President hlui Thein Sein erawh a hmuh theih thu hriat a ni bawk.
North Korea Ambassy chuan Mr. Ban Ki Moon zin chungchangah hian North Korea nen inhnamhnawihna eng mah a awm lova, The Elder pawlte ruahmanna liau liau a ni tiin AP news-ah tar lan a ni. Mr. Ban Ki Moon hi The Elders pawla Vice Chairman a ni a, he pawl hi kum 2007 khan north Afarica president hlui Nelson Mandela din a ni a, khawvel ram hrang hrang hruaitu hluite an tel nual a ni.
