Thailand ram Bangkok khuaa Myanmar hnathawk (migrant worker) kum 20 mi Nan-Dawl chu thla hmasa July ni 1 khan Thai lottery-a pawisa man theihna sang ber lawmman pakhatna ticket number 713517 hmangin a man a, Thai pawisa Baht maktaduai 6 dawng tur ni mah se, maktaduai 1 chiah a dawn thu Thai TV-in tun hnaiah a puang chhuak a.
He thil thlen dan chungchangah lottery mantu, Nan-Dawl -i chuan media reporter pakhat hnenah, ‘June thla chawlhkar tawpah amah leh a hna thawhpui thiante 16 chu an hna thawhna neitu, an pu piancham lawmin a in lamah an va kal a. Chutah chuan an pu chuan thingfanghma den (tauh), chu dawra a khilai bakah lottery ticket pakhat theuh a pe a, an man a nih chuan a chanve-a insem turin an sawi’ tih a hrilh a.
July ni 1-a lottery a man thu a hriat chuan an vaia an hlim thu leh, an puin a hriat veleh a chanve-a insem a tiam thu a sawi nawn leh mai bakah tax (chhiah) pek tur pawisa baht nuai 6, a hnathawhpui 16 te pawh cheng sing nga theuha a pek tur thu leh lottery agreement buatsaihtu pawh nuai 2 pek a ngaih tur thute a hrilh niin a sawi a.
Ani pawhin a remti a, chutianga an inrem siam hnua a sum dawn tur chu cheng maktaduai 2.2 ni mah se, July ni 4-ah an pu chuan maktaduai 1 chiah a pe a, a bak chu bank atanga sing 5 zela thla tin a thawn tur thu a hrilh a ni.
Mahse, chu mi hnu chuan an pu khawsak zia chu danglamin a hnathawhpui a bial chu nasa takin a chhawr a, an tawrh theih loh tawpah an pahnihin an chhuahsan a. Hna atanga an ban hnu, July ni 29-ah an awmna in chhawng chu police ho lo kalin ID an rawn check a, a bialpa work permit card a lo expire takah chuan man a ni a, chu tih lai chuan police-in video call-a tuemaw biain, ‘hei hi a ni maw’ tia a zawh thu Nan-Dawl -i chuan a sawi a.
Tun hma zawngin an awmna in chu check a nih ngai loh thu leh an hna thawhna pu nen, an intihthiam loh hnua police lama report an nih a rin thu leh a bialpa chu tun thlenga man a nih thu a sawi bakah, a bialpa thubuai chin fel nan, a pu hnenah pawisa la bang chu dil mah se, a lo pek duh loh thute chu a sawi zel a.
He mi chungchangah, Amarin media group lam chuan an pu chu an va zawt chiang a, ani chuan lottery man chungchang chu thudik lo a nih thu a lo hrilh a, chu bakah reporter pawh chu mahni kuang lo nawra thubuai siamsak tumin a lo vau bawk a ni.Mahse, media lam chuan an thingfanghma eina dawrah kala an va zawh chian chuan dawrneitu chuan June ni 26-a an rawn ei ngei thu leh an puin lottery ticket a pek ngei thu a lo sawi a.
Tichua, Amarin Media chuan Thai ukil Ni-Ti-Thuam chu thu kal zel dan tur an zawt a, ani chuan ‘migrant worker (Myanmar mi) hian document felfai nei lo mah se, lottery a man miau chuan chan theihna right a nei a, document a neih lohna thubuai chu a hranin a hmachhawn mai tur a ni. He thubuaiah hian han thawktu lamin lungawi lo a, thubuai an thehlut a nih chuan an pu chu mi bumna leh dan lova hna thawk chhawrna case (thubuai) siamsak a ni ve ang tiin a sawi a.
Mahse, mi rama hna thawka awm ve mai Myanmar nula Nan-Dawl-i chuan engtin nge kalpui zel a tum chiah erawh hriat a la ni lo.
